Një 44-vjeçar është arrestuar nga policia e Elbasanit pasi përplasi një këmbësor dhe një mjet bujqësor të parkuar dhe u largua nga vendngjarja.

Në pranga ka rënë edhe pasagjeri, 55 vjeç, për shkak se nuk kallëzoi incidentin.

Ngjarja u regjistrua në fshatin Tregan, pasditen e djeshme, më 6 shkurt.

Sipas policisë, drejtuesi i automjetit, në gjendje të dehur, përplasi një këmbësor dhe një mjet bujqësor të parkuar, dhe më pas u largua nga vendi i aksidentit.

Pas hetimeve dhe veprimeve të shpejta, specialistët e qarkullimit rrugor identifikuan dhe kapën 44-vjeçarin, i cili akuzohet për aksidentin dhe largimin nga vendngjarja. Po ashtu, u arrestua edhe pasagjeri A. B., 55 vjeç, pasi nuk raportoi incidentin, sipas detyrimeve të ligjit.

Këmbësori i përfshirë në aksident, F. K., 56 vjeç, ka marrë dëmtime dhe ndodhet nën kujdesin e mjekëve në Spitalin e Traumës në Tiranë.

Automjeti i 44-vjeçarit është sekuestruar nga policia si pjesë e hetimeve ndërsa materialet procedurale i kaluan Prokurorisë së Elbasanit për veprime të mëtejshme.

LEXONI GJITHASHTU:

• Aksidenti me vdekje në “Cërrik-Gramsh”, arrestohen 2 shoferët e mjeteve
• Makina përplas këmbësorin në Elbasan, dërgohet te Trauma në gjendje të rëndë