Manastirliu: Një Tiranë moderne dhe europiane, në qendër të kontratës me qytetarët

Partia Socialiste ka nisur zyrtarisht përgatitjet për zgjedhjet vendore të 9 nëntorit, me një fokus të veçantë në garën për Bashkinë e Tiranës.

Kandidatja e PS për kryetare bashkie, Ogerta Manastirliu, dhe drejtuesja politike e fushatës për Tiranën, Belinda Balluku, kanë zhvilluar takime intensive me shtabet drejtuese të njësive administrative të kryeqytetit, me qëllim rienergjizimin e strukturave dhe ndërtimin e një fushate të mirëorganizuar e mbi baza të forta bashkëpunimi.

Gjatë takimeve, u theksua rëndësia strategjike e Tiranës në zhvillimin kombëtar dhe roli kyç që ka fitorja e saj për realizimin e vizionit Tirana2030, si pjesë e projektit më të gjerë të Partisë Socialiste për një Shqipëri europiane deri në vitin 2030.

“Fushata jonë është një kontratë e re besimi me qytetarët tanë, për një Tiranë më moderne, më solidare dhe më europiane. Tirana2030 është pjesë e pandarë e vizionit për Shqipërinë2030″, Ogerta Manastirliu.

Nga ana e saj, drejtuesja politike e fushatës për Tiranën, Belinda Balluku, theksoi rëndësinë e angazhimit të plotë të strukturave të PS në çdo njësi administrative dhe të organizimit të terrenit.

“Ky proces do të garantojë një fushatë të organizuar, gjithëpërfshirëse dhe fituese”. tha Balluku.

Përmes këtij angazhimi të hershëm dhe të koordinuar, Partia Socialiste synon jo vetëm të fitojë drejtimin e Bashkisë së Tiranës, por edhe të çojë përpara transformimin urban dhe social të kryeqytetit në përputhje me aspiratat europiane të qytetarëve dhe objektivat e planifikuara deri në vitin 2030.