Sezon i ri, histori e vjetër, kjo shprehje me gjasë mund të përsëritet edhe këtë sezon për Arsenalin që synon fitimin e titullit kampion, por 6 javë para fundit londinezët kanë pësuar një humbje që do të peshojë shumë. Të rikthen në memorie topcinjtë e vitit të shkuar që deri para fundit ishin në krye, më pas u dorëzuan drejt Manchester Cityt, që edhe në këtë moment mori kreun e renditjes, pasi humbje regjistroi dhe Liverpool. Një kampionat tejet i luftuar, ashtu sic e ka karakteristikë tempulli i futbollit, ndërsa diferenca me vendin e dytë është vetëm 2 pikë.
Skuadra e Artetës, e cila ka një tjetër përballje decisive në mesjavë në Champions, hasi shumë vështirësi ndaj Aston Villës, me spanjollin që nuk kurseu asnjë lojtar. Dominimi dhe qarkullimi i topit nuk mungoi, por nëse nuk shënon, pëson. Bailey e Watkins ishin shënuesit e miqve në minutat 84 dhe 87 duke sjellë fitoren tek Aston Villa, që qëndron e katërta.
Si të mos mjaftonte Arsenali, Liverpool po ashtu humbi ndaj Crystal Palace, një kundërshtar që shpesh shkakton probleme. Një gol i Eze në fraksionin e parë theu ekuilibrat, e deri në fund nuk pati më asnjë ndryshim pavarësisht tentativave të shumta të të kuqve, që pësojnë humbjen e tretë sezonale në Premier, e gjenden në vendin e 3-të, 2 pikë pas Man Cityt kryesues. Më herët the cityzens likujduan Lutonin 5-1 për të marrë kreun, që duket se do ta mbajnë gjatë, me shpresën për të përsëritur vitin e shkuar.
LEXONI GJITHASHTU:
- Champions League| Spektakël dhe gola, nuk ka fitues në dy çerekfinalet e para
- Kërcënimi i ISIS, blindohen stadiumet ku do të luhen ndeshjet e Champions League
