Maqedonia e Veriut feston sot 5 vjetorin e anëtarësimit në NATO

Maqedonia e Veriut shënon këtë muaj pesë vjetorin e anëtarësimit të saj në NATO, një prej arritjeve më të mëdha gjeopolitike që vendi ka realizuar që nga pavarësia. Nga data 27 mars 2020, flamuri i shtetit u ngrit në selinë e Aleancës në Bruksel, duke e vendosur vendin në mesin e vendeve që gëzojnë mbrojtje kolektive të NATO-s.

Gazetarja e Euronews Albania, Ferikan Iljazi ka bërë një pasyqrim se si erdhi anëtarësimi i Maqedonisë së Veriut në NATO pas disa pengesave politike.

“Anëtarësimi erdhi pas një periudhe të gjatë negociatash dhe rënieje të pengesave të ndryshme politike, veçanërisht mosmarrëveshjes me Greqinë për çështjen e emrit. Marrëveshja e Prespës, e arritur në vitin 2018, zgjidhi këtë çështje me ndryshimin e emrit zyrtar të shtetit në “Maqedonia e Veriut”, tha ajo.

Në një kontekst gjeopolitik gjithnjë e më të tensionuar, veçanërisht pas agresionit rus në Ukrainë, dhe trazirave në rajonin e Ballkanit, anëtarësimi në NATO ka fituar edhe më shumë peshë strategjike për RMV-në.

“Anëtarësimi i vendit në NATO u vlerësua si arritja më e madhe në historinë e shtetit. Anëtarësimi pasoi pas një përpjekjeje të mëparshme për grusht shteti në prill të vitit 2017. Me anëtarësimin e vendit, aleanca më e madhe politike-ushtarake në botë vendosi kufij të qartë në rajon mes aleatëve ushtarakë dhe kërcënimeve ndaj sigurisë, veçanërisht në Ballkan”, raportoi Ferikan Iljazi.

LEXONI GJITHASHTU:

• Mungesa e punëtorëve në Gjirokastër, bizneset punësojnë familjarët ose të huaj
• 1.6 miliardë euro investime të huaja në Shqipëri, kryeson Turqia