Maqedonia e Veriut nis fushatën e testimit për COVID-19 në shkolla

Në Maqedoninë e Veriut ka nisur testimi i nxënësve për COVID -19.

Rreth një muaj e gjysëm pas fillimit të shkollës me prani fizike 258 nxënës gjimnazistë dhe të shkollave fillore janë të parët që do t’u merren mostrat.

Nxënësit që kanë pranuar të jenë pjesë e testimit, thonë se duan që të jenë të sigurt për vete dhe shokët në mënyrë që edhe mësimin ta zhvillojnë pa frikë.

“Unë pranova ta bëj këtë skrining pasi që doja të di a janë të gjithë të sigurt që të mbahet edhe shkolla më sigur”, tha një nxënës.

“E bëj për shëndetin tim. Kam patur një shok të ngushtë të infektuar dhe duhej të rrija në izolim”, tha një tjetër.

Ekipet e Qendrës për shëndetit publik po shkojnë nga shkolla në shkollë për të marrë mostrat dhe ua tregojnë nxënësve rezultatet aty për aty.

Nëse ndonjë nxënës rezulton pozitiv, atëherë aktivizohen protokollet për izolim në hapësirë të veçantë në shkollë dhe njoftohen prindërit, por edhe institucionet shëndetësore.

“Kjo është shkolla e parë ku kemi nisur punën mirëpo duket që është organizuar shumë mirë. Kemi mirëkuptim edhe prej nxënësve. Me rëndësi është që këtu kemi edhe hapësirë të madhe, distancë mes nxënësve. Kemi dhe dy tre shkolla më të mëdha që duhet ti testojmë sot gjatë ditës. Ja e shihni që edhe rezultatet dalin menjëherë”, tha mikrobiologu Denis Jankullovski

Deri në fund të fushatës së testimit, pritet që të testohen mbi 8 mijë nxënës në nivel shteti dhe rezultatet pritet të jenë udhërrëfyes për organizimin e mëtejshëm të procesit arsimor.