Mariupoli do të vazhdojë të luftojë, thotë kryetari i qytetit

Kryetari i qytetit të Mariupolit, Vadim Boiçenko, tha të enjten se qyteti nuk do dorëzohet.

“Mariupoli ishte, është dhe do të vazhdojë të jetë një qytet ukrainas”, u shpreh ai.

Boiçenko i quajti lajme të rreme raportet ruse se porti i qytetit ishte kapur dhe se më shumë se 1000 luftëtarë ukrainas ishin dorëzuar.

“Qyteti po mbrohet ende nga regjimenti Azov i ushtrisë ukrainase dhe forcat detare”, tha Boiçenko.

Qyteti ka qenë i rrethuar nga trupat ruse dhe separatistët pro-rusë për javë të tëra.

Pjesa më e madhe e tij është shkatërruar dhe kushtet humanitare për banorët e mbetur janë katastrofike.

Ndërkohë, rusët vazhduan të bombardojnë rajonet e Harkivit, Donjeckut dhe Zaporizhjas gjatë natës, tha Shtabi i Përgjithshëm ukrainas në raportin e tij të mëngjesit të së enjtes.

LEXONI GJITHASHTU:

• Ukraina pretendon se rusët mbajtën peng 300 civilë në bodrumin e një shkolle