Marrëveshja PS-Rithemelimi, reagon Ambasada Gjermane: Shenjë inkurajuese

Ambasada Gjermane në Tiranë ka reaguar lidhur me dakodësinë e arritur gjatë ditës së sotme në Konferencën e Kryetarëve, për t’i dhënë fund kaosit në Parlament dhe për të plotësuar kërkesat e opozitës për Komisionet Hetimore.

Përmes një njoftimi në rrjetet sociale, Ambasada shkruan se kjo është një shenjë inkurajuese për procesin demokratik dhe për rrugën e Shqipërisë drejt Bashkimit Evropian.

Po ashtu, Ambasada në njoftimin e saj thotë se qytetarët me të drejtë presin që Prlamenti i tyre të bëjë të mundur, që shkëmbimi dhe gara e ideve të ndryshme të zhvillohen paqësisht dhe në përputhje me rregullat.

Reagimi i Ambasadës Gjermane:

🇦🇱 | Ambasada Gjermane mirëpret marrëveshjen për rifillimin e aktivitetit konstruktiv të Kuvendit me pjesëmarrjen e të gjitha grupeve politike të përfaqësuara. Kjo është një shenjë inkurajuese për procesin demokratik dhe për rrugën e Shqipërisë drejt Bashkimit Evropian. Qytetarët/et me të drejtë presin që parlamenti i tyre të bëjë të mundur, që shkëmbimi dhe gara e ideve të ndryshme të zhvillohen paqësisht dhe në përputhje me rregullat.

Vetëm në këtë mënyrë Parlamenti mund të përmbushë rolin e tij thelbësor kushtetues: kontrollin e pushtetit ekzekutiv dhe legjislativ në interes të qytetarëve të përfaqësuar nga deputetët.