Masa ekstreme në Serbi, policia ndalon hyrje-daljet në hotelin e Kombëtares

Policia serbe ka vendosur që askush të mos hyjë dhe dalë nga hoteli ku qëndron Kombëtarja shqiptare, pavarësisht akreditimit.

Madje as stafi dhe lojtarët; i vetmi që ka mundur të dalë është presidenti i FSHF-së. Madje, as për të filmuar policët në hyrje të hotelit nuk lejohet.

Sipas raportimit të gazetarit të Euronews Albania, Enriko Gaba, nga qyteti i Nishit, masat e sigurisë janë shumë të rrepta si pjesë e një plani të organizuar nga Federata Serbe e Futbollit dhe Policia Serbe, me qëllim garantimin e sigurisë.

“Ne kemi ardhur në Nish, pas shpinës sime është hoteli i Kombëtares shqiptare. Të gjitha hyrjet e këtij hoteli ishin të bllokuara, nuk jemi lejuar të kryejmë filmime për shkak të masave të policisë. Asnjë person nuk ka të drejtë të hyjë brenda rrethimit të hotelit. Edhe Duka, kur ka lëvizur, është shoqëruar nga forcat e policisë. Në orën 18:30 Kombëtarja shqiptare do të niset drejt stadiumit, ku do të shoqërohet nga policia deri në hyrje të stadiumit, ku edhe aty siguria do të jetë maksimale, me kontrolle në të gjithë zonën. Atmosfera është pozitive në kampin kuqezi. Është një nga ndeshjet më të vështira në këtë fushatë të kualifikueseve të Kupës së Botës,” tha ai.

Kujtojmë që sot në mbrëmje Kombëtarja përballet me Serbinë në stadiumin e Leskovacit, në kuadër të eliminatoreve të Botërorit.

LEXONI GJITHASHTU:

• “S’më ka ndodhur kurrë”, gazetari flet nga Serbia: Na kontrolluan fotot në celular
• Snajperë dhe ekspertë të dronëve, Serbi–Shqipëri është shumë më tepër se futboll