Masa ndaj ish-ministrit Beqaj, PD: Tregues se kjo qeveri është e mbytur në zullume

Partia Demokratike e ka cilësuar masën e vendosur nga SPAK ndaj ish-ministrit të Shëndetësisë, Ilir Beqja, si një tregues që qeveria shqiptare është e mbytur në zullume e korrupsion.

Përmes një deklarate për mediat, zëdhënësja e PD-së, Mirela Karabina, është shprehur se forca politike që ajo përfaqëson mbështet SPAK në hetimin e plotë të aferës së sterilizimit.

Ajo shtoi po ashtu se Partia Demokratike siguron shqiptarët se do të vijojë të denoncojë aferat korruptive të kësaj qeverie.

Deklarata e plotë:

Partia Demokratike e Shqipërisë është e vendosur në mbështetjen e saj për çdo hetim dhe për çuarjen përpara drejtësisë të çdo zyrtari të korruptuar në këtë vend.

Shqiptarëve u ka munguar drejtësia, ndaj ata presin të vërtetohen akuzat penale në mënyrë që të ndërpritet balta dhe tymnaja politike.

Vetëm kështu mund të merret vesh e vërteta dhe koha e pandëshkueshmërisë të marrë fund.

Dhënia e masës së sigurisë ndaj ish-ministrit të Shëndetësisë, Ilir Beqaj, për koncensionin e sterilizimit, është një lajm i mirë për Shqipërinë dhe shqiptarët.

Ne si Parti Demokratike jo vetëm që e kemi denoncuar të parët këtë aferë, por shprehim mbështetjen tonë maksimale për organin e akuzës dhe kërkojmë që çështja të hetohet me profesionalizëm dhe me korrektësi.

Ne si Parti Demokratike kërkojmë nga SPAK që njëkohësisht të vijohet me inceneratorët dhe aferat e tjera të kësaj mazhorance, të cilat ne vazhdimisht i kemi bërë publike.

Dhënia e masës ndaj Ilir Beqajt, mikut të ngushtë të Edi Ramës, është treguesi më i qartë se kjo qeveri është e mbytur në zullume dhe në korrupsion.

40 hajdutët e mazhorancës kanë Edi Ramën në krye, ndaj çdo hetim dhe fillim çështjeje penale, në të vërtetë është ngushtim laku për shefin e tyre.

Partia Demokratike si e vetmja forcë euro-atlantike inkurajon hetimet, shpreh mbështetjen e saj dhe siguron shqiptarët se do të vijojë të denoncojë aferat korruptive të kësaj qeverie.

LEXONI GJITHASHTU:

• Makineritë e sterilizimit aty ishin, Alimehmeti: Beqaj s’pranoi, kishte këtë plan
• “Hetimi për Beqajn nuk është mbyllur”, ish-prokurorja: Gjithçka mund të ndryshojë