Masakra me 12 të vrarë në Mal të Zi, kërkohet dorëheqja e krerëve të sigurisë

Protestuesit në Malin e Zi kanë kërkuar dorëheqjen e krerëve të institucioneve të sigurisë, të cilët i konsiderojnë përgjegjës për masakrën e 1 janarit. Për manifestuesit, autoritetet nuk kanë bërë sa duhet për të frenuar dhunën e armëve në vend.

Disa mijëra qytetarë protestuan sërish në Malin e Zi për të kërkuar dorëheqjen e krerëve të sigurisë, pas vrasjes së 12 personave në masakrën e ditës së parë të vitit të ri.

Manifestuesit mbajtën mitingje simultane në Podgoricë dhe në qytetin e Çetinjes, ku ndodhi dhe tragjedia.

Shumë banorë të Çetinjes janë të mendimit se policia keqmenaxhoi situatën dhe nuk ka bërë sa duhet për të nxitur sigurinë që prej masakrës së gushtit 2022.

Sinkron Maja Gardasević, organizatore e protestës:

“Jemi këtu për të marrë përgjigje. Përse masakra në Çetinje u përsërit? Përse nuk mban përgjegjësi askush? Përse e kanë kaq të vështirë të japin dorëheqjen? Përse askush nuk po na përgjigjet? Për më tepër, kur mes viktimave kishte 2 fëmijë…”

Masakra e ditës së parë të 2025-s erdhi pas një sherri në një bar. Një 45-vjeçar vendas shkoi në shtëpi, mori armën, u kthye dhe hapi zjarr. Ai vrau 4 persona atje dhe 8 të tjerë teksa largohej, përpara se të vriste veten.

Ngjarja ka ngritur pyetje mbi gatishmërinë e institucioneve shtetërore për të frenuar problemin, përfshirë armëmbajtjen.

Nga ana e saj, policia ka deklaruar se episodi ishte i pamundur të parashikohej, edhe pse autori, Aco Martinović ishte dënuar më parë për akte dhune dhe armëmbajtje pa leje.

Autoritetet njoftuan menjëherë një ligj të ri dhe më strikt për armët, si dhe një seri masash për të ndaluar dhunën e armëve.

Të dielën, uniformat blu bastisën disa lokacione në vend dhe konfiskuan mbi 20 armë, mbi 500 fishekë dhe eksploziv.

Ndërsa kryeministri Milojko Spajić premtoi ndëshkime të rënda për këdo që shkel ligjet e reja.

LEXONI GJITHASHTU:

• Disa të vdekur pas konfliktit me armë zjarri në një tavernë në Mal të Zi
• Protestë në Mal të Zi, kërkohet lirimi i ushtarëve të arrestuar në Kosovë