Mbahet mbledhja e komisionit antikorrupsion, opozita bojkoton sërish

Komisioni antikorrupsion ka zhvilluar të premten mbledhjen e radhës. Opozita vijon të mos marrë pjesë në mbledhjet e komisionit të posaçëm antikorrupsion.

Kryetari Fatmir Xhafaj sërish iu ka bërë thirrje për të reflektuar dhe për t’u bashkuar në tryezën e diskutimeve.

Përfaqësues të shoqërisë civile kanë shprehur gatishmërinë për të marrë pjesë, por ky komision është mbështetur në disa rregulla, ndaj ne vihemi në dijeni me kërkesat e tyre për të marrë një vendimmarrje. Është një fazë përgatitore për të arritur atë që ne dëshirojmë, një proces sa më transparent dhe gjithëpërfshirës”, tha Xhafaj.

Gjatë mbledhjes së sotme u vendos që institucionet e pavarura që u është dërguar shkresë duhet që deri në 30 qershor të propozojnë ekspertët që do të asistojnë në 3 nëngrupet e Komisionit të Posaçëm: Mirëqeverisja, Sundimi i Ligjit dhe Antikorrupsioni.

Ngritja e komisionit të posaçëm antikorrupsion u votua në Kuvend në seancën e 30 majit vetëm me votat e mazhorancës.

Komisioni i posaçëm për luftën kundër korrupsionit përbëhet nga 11 anëtarë, 6 anëtarë nga mazhoranca dhe 5 anëtarë nga opozita.

Opozita nuk e votoi dhe as e mbështeti ngritjen e këtij komisioni, për të cilën sic tha kreu i grupit parlamentar të PD, Gazment Bardhi nuk iu është dhënë asnjë informacion.