“Mbaroi muaji i mjaltit”, gazetari nga Moska: Marrëdhëniet mes Putinit dhe Vuçiçit në një fazë të ftohtë

Gazetari shqiptar Misha Pumo, i ftuar në një lidhje live për emisionin Balkan Talks, foli nga Moska mbi zhvillimet e fundit në marrëdhëniet mes Serbisë dhe Rusisë, si dhe ndikimin e tyre në rajon. Sipas Pumos, marrëdhëniet mes presidentit rus Vladimir Putin dhe atij serb Aleksandar Vuçiç kanë hyrë në një fazë më të ftohtë, duke lënë pas “muajin e mjaltit” që mund të kishte pasur në fillim të mandatit të Vuçiç.

“Duket se tani ka një marrëdhënie më të ftohtë në nivel qeveritar mes dy vendeve. Rusia nuk heq dorë nga lidhjet historike me Serbinë dhe kishën ortodokse serbe, por në praktikë nuk kemi më afrim të ngrohtë si më parë,” tha Pumo.

Ai shtoi se deklaratat e Putin për paralele mes Kosovës dhe Krimesë janë të kuptueshme si reflektim i së drejtës së popullit për vetëvendosje, por nuk nënkuptojnë që Rusia e ka ndryshuar qëndrimin ndaj të drejtave të Serbisë në rajon.

“Është një jehonë e bisedimeve dhe një konfirmim se temat e të drejtës së popullit për vetëvendosje trajtohen de fakto pa kontestime të drejtpërdrejta,” shtoi gazetari.

Misha Pumo gjithashtu theksoi një ndryshim të dukshëm në politikën e Beogradit.

“Presidenti Vuçiç duket se po kërkon përherë e më shumë afrim me Brukselin. Vetëm dy ditë më parë kishte mbledhur grupin e punës dhe u dha porosi të qarta për një dinamikë më të përshpejtuar në këtë drejtim. Kjo mund të shihet si refleksion i krisjes së raportit me Kremlinin zyrtar”, tha Pumo.