Mblidhet grupi i punës për Reformën Zgjedhore, zbardhen propozimet e palëve

Në Kuvend është mbledhur ditën e sotme grupi i punës për Reformën Zgjedhore.

Puna është bllokuar pasi opozita kërkon rikthimin e koalicioneve parazgjedhore siç kanë qenë më herët.

Mazhoranca nuk jep konsensus për t’u rikthyer tek marrëveshja e 5 qershorit. Diskutimet u zhvilluan rreth kësaj pike prej më shumë se një ore.

Rikthimi i koalicioneve ku secila parti ka listën e saj të kandidatëve, është kusht për opozitën për të vijuar diskutimet për çështjet e tjera.

Në përfundim të mbledhjes, bashkëkryetari socialist Damian Gjiknuri është shprehur se nuk u arrit të gjehej gjuha e përbashkët pavarësisht përpjekjeve.

Ai tha se duhet të adresohen vendimet e Kushtetueses, vota e diasporës dhe herësi.

“Nuk ja dolëm pavarësisht përpjekjeve. Duhet të adresojmë vendimet e Kushtetueses. Vota e diasporës dhe herësi. Nëse s’ka konsensus mazhoranca do i iniciojë vetë. Herësi. Formula e ndarjes së mandateve. Do sjellim propozomet tona. Votim elektrok në 5 qarqet më të mëdha. Japim konsensus. Për 5 qershorin nuk i ndihmojmë dot. Të mos e përmendin më si kusht. Çdo ligj që miratohet, kalon brenda korrikut, ndryshe s’ka më kohë”, tha Gjiknuri.

Nga ana tjetër, bashkëkryetari nga ana e opozitës i këtij grupi pune, ka thënë se ndryshimi i njëanshëm gjymtoi sistemin Zgjedhor. Bylykbashi tha se Rama dhe PS e dinë që koalicioni kthen në pushtet opozitën, prandaj sipas tij, ata po mbajnë peng reformën.

“Ndryshimi i njëanshëm gjymtoi sistemin zgjedhor. Po kërkojmë që zgjedhesit të kenë të drejtën e listës së hapur, kërkojmë që zgjedhësit të votojnë kandidatët që duan. Por Rama kërkon që të fitojë në tryezë zgjedhjet. Kërkojme që reforma të jetë e plotë dhe e drejtë. Duhet të kthehemi te dakordësia e “5 qershorit”. Rama e di që koalicioni kthen në pushtet opozitën, prandaj po mban peng reformën që që mbajë pushtetin me dhunë. Koalicionet janë çështja thelbesore e reformës, presim që OSBE/ODIHR të shprehet për çështjen e koalicioneve. PS nuk ra dakord me propozimin tonë për koalicionet”, tha Bylykbashi.

LEXONI GJITHASHTU:

• Reforma zgjedhore, sugjerimet e Celibashit për votimin elektronik dhe depolitizimin
• Kthupi: Të gjitha partitë politike të përfshihen te Reforma Zgjedhore