Mbrojtja e Mediut kërkon riekspertim për Gërdecin: Mund të jetë ngjarje e qëllimshme

Në seancën e sotme në procesin e ish-ministrit të Mbrojtjes Fatmir Mediu, avokatët bënë kundërshtimet e tyre në lidhje me dy ekspertizat të paraqitura nga SPAK një seancë më parë për ekspertizën e shkaqeve të shpërthimit të bërë nga ekspertët amerikanë dhe ekspertizën ushtarake.

Mbrojtja e Mediut deklaroi se ish-ministri i Mbrojtjes nuk ka lidhje me asnjërën nga provat e paraqitura nga SPAK, por megjithatë ata kanë bërë kundërshtimet e tyre.

Avokati Henrik Ligori tha në seancë se ekspertët amerikanë e kanë lënë të hapur shkakun e shpërthimit, duke paraqitur 5 hipoteza të mundshme sa i përket shkakut që ka ndodhur ngjarja.

Sipas tij, mund të merret parasysh edhe një shkak i gjashtë, që mund të jete ngjarje e qëllimshme, e cila nuk është hetuar. Për këtë arsye, avokati kërkoi të pyeten ekspertët që kanë bërë ekspertimin dhe të bëhet edhe një eksperiment për shkaqet e shpërthimit, për të kuptuar nëse shpërthimi mund të ketë ndodhur ose jo nga karroca e salduar.

Kjo kërkesë u kundërshtua nga prokurori i çështjes Klodian Braho, i cili tha se është e panevojshme kryerja e një eksperimenti. Të njëjtin argumentin parashtroi edhe avokati i viktimave Dorjan Matlia.

Sipas këtij te fundit, nuk ka rëndësi se kush e vuri shkrepësen dhe se si ndodhi, por se si ishin kushtet që ndodhi ajo tragjedi.

Sa i takon kësaj kërkese, Gjykata e Posaçme tha se do shprehet në fund të procesit. Ndërkohë gjykata relatoi se nga Ministria e Drejtësisë kishte ardhur përgjigja në lidhje me pyetjen e dëshmitarëve të kërkuara nga SPAK, që janë përfaqësues të kompanisë SAC në Amerikë.

Përgjigja e drejtësisë amerikane thoshte që ata nuk kanë mundësi që pyetja e tyre të bëhet në një seancë gjyqësore, pasi shteti amerikan nuk e ka një praktike të tillë, por mund të pyeten nëse bie dakord pala shqiptare, nga agjentet e FBI.

Në lidhje me këtë përgjigje edhe prokurorët, por edhe avokatët e Mediut thanë se do të shprehen në seancën e radhës, e cila u caktua më datë 2 maj ora 10.00.

LEXONI GJITHASHTU:

• Pyetja e dëshmitarëve për Gërdecin: 2 nuk gjenden, i treti refuzon të dëshmojë
• Gjyqi për Gërdecin, Mihal Delijorgji shkon në GJKKO por refuzon të dëshmojë