Pyetja e dëshmitarëve për Gërdecin: 2 nuk gjenden, i treti refuzon të dëshmojë

Denis Hajdari, ish-anëtari i komisionit të çmimeve në demontimin e armëve në Gërdec, i thirrur me shoqërim te detyrueshëm nga Gjykata e Posaçme Antikorrupsion, ishte i vetmi dëshmitar që u paraqit në seancën e kësaj të marte për “Gërdecin”.

Hajdari nuk preferoi të fliste, duke ushtruar të drejtën që i jep ligji, si një person i pandehur edhe në procesin e parë gjyqësor për tragjedinë e Gërdecit.

Ndërsa dy dëshmitarët e fundit Luan Hoxha dhe Anjola Agolli ish sekretarja e ministrisë së Drejtësisë, e cila sipas prokurorisë ka dërguar fax-in me mbishkrimin “për Shkëlzen Berishën” drejt ministrisë se Mbrojtjes, nuk u gjetën nga policia as në këtë seancë.

Sipas komunikimeve që policia ka patur me familjarët e Agollit, ata thanë kjo e fundit nuk ndodhej në Shqipëri. Por, nga nje verifikim i bërë nga prokurorët e posaçëm në sistemin TIMS, rezultoi se Anjola Agolli ndodhet në Shqipëri.

Prokuroria kërkoi që të lexohen thëniet e saj, por në seancën e radhës pasi të shfrytëzohen mundesitë e tjera për ta gjetur.

Ndërsa për Luan Hoxhën, u vendos të adminostroheshin dëshmitë e dhëna më datë 17.02.2009 si person i pandehur. Ndërkohë nga avokatët e Mediut dhe nga avokati i viktimave u këmbëngul që Luan Hoxha të pyetet me letërporosi ose përmes video konferencës.

Por, sipas prokurorit kjo gjë është e pamundur pasi nuk ka një adresë të saktë të vendndodhjes së tij në SHBA.

Prokuroria vijoi me administrimin e provave shkresore, ku ishin ekspertimi teknik i shpërthimit, ekspertimi kontabël i dëmeve dhe ekspertimi ushtarak në lidhje me municionet e demontuara.

Mbrojtja e Mediut i kërkoi Prokurorisë të percaktonte rolin e ish ministrit të mbrojtjes dhe përgjegjësitë e tij lidhur me provat që ato administrojnë.

Seanca e radhës u la më datë 24 prill ora 09.00.

LEXONI GJITHASHTU:

• “Prita 16 vite për tu pyetur”, Mediu-dëshmitarëve: Mos heshtni për “Gërdecin”
• “Gërdeci”- Mbërrin letërporosia nga SHBA për marrjen në pyetje të shtetasve të huaj