Mbyllen hetimet për vrasjen e 19-vjeçarit në Fier, dy të dyshuarit çohen për gjykim

Prokuroria e Fierit ka njoftuar se ka mbyllur hetimet për vrasjen e 19-vjeçarit Grei Bihuci në mars të vitit 2024.

Nxënësi i shkollës “Petro Sota”, që studionte për teknologji informacioni, humbi jetën pasi u plagos me thikë gjatë një konflikti me bashkëmoshatarë të tij në Fier.

Sherri ndodhi pas një konflikti të nisur në rrjetet sociale, ndërsa Prokuroria e Fierit ka dërguar në gjyq për ‘Vrasje me paramendim’ dy shtetas, një prej të cilëve i mitur, ku kërkon përkatësisht 25 vite burgim për Fatjon Mukën dhe 12 vite e 6 muaj për të miturin K.M.

Ata akuzohen për veprat penale ‘Vrasja me paramendim’, e kryer në bashkëpunim, dhe ‘Prodhimi, mbajtja, blerja apo shitja pa leje e armëve të ftohta’, të parashikuara nga nenet 78/1 e 25 dhe 279/2 të Kodit Penal.

“Nga hetimet e kryera mbi procedimin penal nr. 382 të vitit 2025, rezultoi e provuar se, në datën 11.03.2024, rreth orës 11:30, në lagjen “Kongresi i Përmetit” të qytetit të Fierit, gjatë një takimi për t’u sqaruar lidhur me një konflikt të ndodhur ditë më parë dhe të publikuar në rrjetet sociale, të pandehurit F.M. dhe K.M., të cilët kanë pasur me vete armë të ftohta, në bashkëpunim me njëri-tjetrin kanë goditur viktimën G.B., duke i shkaktuar atij vdekjen e menjëhershme”, thuhet në njoftimin e Prokurorisë.

Njoftimi i plotë

“Vranë shtetasin G.B. pas konfliktit të nisur në rrjetet sociale, Prokuroria e Fierit dërgon në gjyq për ‘Vrasje me paramendim’ dy shtetas, një prej të cilëve i mitur

Prokuroria pranë Shkallës së Parë e Juridiksionit të Përgjithshëm Fier, përfundoi hetimet dhe dërgon në gjyq shtetasit F.M. dhe K.M. për veprat penale ‘Vrasja me paramendim’, e kryer në bashkëpunim dhe ‘Prodhimi, mbajtja, blerja apo shitja pa leje e armëve të ftohta’, të parashikuara nga nenet 78/1 e 25 dhe 279/2 të Kodit Penal.

Nga hetimet e kryera mbi procedimin penal nr. 382 të vitit 2025, rezultoi e provuar se, në datën 11.03.2024, rreth orës 11:30, në lagjen “Kongresi i Përmetit” të qytetit të Fierit, gjatë një takimi për t’u sqaruar lidhur me një konflikt të ndodhur ditë më parë dhe të publikuar në rrjetet sociale, të pandehurit F.M. dhe K.M., të cilët kanë pasur me vete armë të ftohta, në bashkëpunim me njëri-tjetrin kanë goditur viktimën G.B., duke i shkaktuar atij vdekjen e menjëhershme.

Prokuroria pranë Gjykatës së Shkallës së Parë të Juridiksionit të Përgjithshëm Fier kërkoi  Deklarimin fajtor të të pandehurit F.M. për kryerjen e veprës penale “Vrasja me paramendim” e kryer në bashkëpunim, dhe në bazë të neneve 78/1 e 25 të Kodit Penal dënimin e tij me 25 vjet burgim. Si dhe deklarimin fajtor të të miturit në konflikt me ligjin K.M. për kryerjen e veprës penale “Vrasja me paramendim” e kryer në bashkëpunim, dhe në bazë të neneve 78/1 e 25 dhe 51 të Kodit Penal dhe 97/2 të Kodit të Drejtësisë Penale për të Mitur, dënimin e tij me 12 vjet dhe 6 muaj burgim.

Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë dhe vënien para përgjegjësisë ligjore të të gjithë personave që kryejnë vepra penale kundër jetës dhe shëndetit”, thuhet në njoftim.

LEXONI GJITHASHTU:

• U vra me thikë pas konfliktit, ky është 19-vjeçari që humbi jetën në Fier
• Vrasja me thikë e të riut në Fier, policia arreston dhe një 17-vjeçar
• “Djali im nuk është fajtor”/ Nëna e Klajdi Mukës ngushëllon familjen Bihuci!
• Menaxheri i pastiçerisë ku punonte 19-vjeçari që u vra në Fier: Grei ishte i urtë