Më pak se 20 ditë fushatë në Himarë: Opozita në pikëpyetje për formulën, PS e vetme

Zgjedhjet e 4 gushtit në Himarë nuk do të jenë të pazakonta vetëm për zhvillimin e tyre në mes të të nxehtit dhe në kulmin e sezonit turistik.

Ato do të jenë gjithashtu edhe zgjedhjet për të cilat partitë politike do të kenë më pak afat se herët e tjera për të zhvilluar fushatë elektorale.

Komisioni Qendror i Zgjedhjeve po përgatit një dokument me afate konkrete për të gjitha palët politike që duan të përfshihen në këtë proces.

Së pari, palëve do t’ju kërkohen emrat e komisionerëve dhe numëruesve.

Më pas do të shpallet një afat final se kur duhet të regjistrohen partitë pjesëmarrëse, e më vonë edhe koalicionet zgjedhore.

Më pas, do të lihet një afat për zyrtarizimin e kandidaturave, që përbën edhe pikën më të nxehtë të vendimmarrjes së palëve.

Socialistët e kanë të qartë skenarin e vajtjes në zgjedhje të vetëm, dhe me një kandidat, që deri më tani, rrotullohet rreth Prefektit Vangjel Tavo, edhe pse burimet nuk përjashtojnë ndonjë emër tjetër surprizë në momentet e fundit.

Ekuacioni është më i vështirë mes opozitarëve, ku Berishës i takon të vendosë nëse do të përfshihet më në betejën për këtë qytet, apo do t’ja lërë atë PBDNJ-së ta përballojë e vetme. Skenarët paraprakë e shohin të vështirë kandidimin e djalit të Fredi Belerit nën siglën e PD-së,  dhe më të mundshëm që Vangjel Dule të dalë veçmas me këtë emër.

Pas regjistrimit të kandidatëve, në Himarë do të fillojë zyrtarisht fushata elektorale, e cila do të mbyllet në 2 gusht, dhe do të jetë më e shkurtra ndonjëherë.

Në Himarë do të votohet dhe numërohet në formën tradicionale, përmes letrës, dhe identifikimi i votuesve do të jetë me aparatura elektronike. Në zgjedhjet e fundit, në këtë bashki morën pjesë në zgjedhje rreth 7800 votues.

LEXONI GJITHASHTU:

• Presidenti Begaj dekreton datën e zgjedhjeve për Bashkinë Himarë
• Beleri flet në KQZ për mandatin: Duhet të betohem pastaj të më shkarkojnë