“Më thoshte i ke kopila”- Rrëfimi prekës i gruas: Burri më vrau vajzën

Personazhi i “Real People” në Euronews Albania këtë javë quhet Shaqe Balliu. Ajo rrëfeu në një intervistë me Flor Gjinin dhimbjet që ka kaluar gjatë jetës së saj dhe vuajtjeve me një burrë që e dhunonte vazhdimisht.

Ajo tregoi se i shoqi, i cili tashmë është në burg duke vuajtur dënimin e shante gjatë gjithë kohës dhe e akuzonte për marrëdhënie jashtëmartesore. Shaqja sot gëzon tre djem, por rrëfen se një vajzë e ka humbur kur ishte shtatzënë, pikërisht nga dhuna.

“Një fëmijë ma ka vrarë ai, një vajzë. Ma vrau duke më rrahur, s’më duhen kopilat e tu tha, unë isha shtatzënë. Ngela pa dashje shtatzënë më atë vajzë, kam qenë 7 muajshe. Bëra tre fëmijë me të se mos ta afroja, ai ishte pijanec, më thoshte i ke kopila, ke dashnor,” – u shpreh Shaqja.

Pasi e dhunonte çdo natë në orët e vona kur kthehej në shtëpi, ai i thyente dhe telefonin në mënyrë që ajo të mos komunikonte me policinë. Kjo është hera e tretë që burri i Shaqes po vuan dënimin për dhunë në familje pas hekurave.

Sipas saj edhe në momentin që do të dalë nga burgu, nuk ka asnjë mundësi që ajo të rikthehet me të, madje më mirë preferon të dalë nga shtëpia edhe pse nuk ka asnjë vend ku të qëndrojë.

LEXONI GJITHASHTU:

• BE-ja i bashkohet Konventës së Stambollit për luftimin e dhunës ndaj grave
• Xhaçka në Oslo: Falënderojmë NATO-n, dënojmë dhunën ndaj KFOR-it