Meçaj: Lushnja dhe Fieri me numrin më të madh të bagëtive, Veriu ka mungesa

Të dhënat nga tregtia e jashtme në tremujorin e parë të vitit 2024 tregojnë se importi i kafshëve të gjalla në sasi u rrit me 62%, teksa një vit më parë në këtë periudhë ndryshimi vjetor ishte 22%.

Të dhënat tregojnë se gati 30% e sasisë së kafshëve të gjalla vjen nga Greqia dhe theren për mish në Shqipëri.

Roland Meçaj drejtor i përgjithshëm i autoritetit kombëtar të veterinarisë tha në emisionin GoodMorning Albanians në Euronews Albania se veriu i vendit ka më shumë mungesë sa i përket numrit të bagëtive ndërsa pjesa më e madhe e tyre janë përqendruar në zonën e Lushnjës dhe Fierit.

“Numri i krerëve në 3 vitet e fundit ka gjetur një stabilitet, ka pasur luhatje për shkak të lëvizjeve demografike pasi shumë blegtorë janë larguar nga fshatrat. Nga statistikat na rezulton se është rritur numri i krerëve në zonën e Lushnjës dhe Fierit, ka rënë numri i krerëve në veri, Elbasani ka nivel të kënaqshëm dhe Tirana ka mbetur njësoj. Është Vlora që kryeson pasi sot është kthyer në një qendër të blegtorisë, kryesisht përmes fermave të mëdha”, tha Meçaj.

LEXONI GJITHASHTU:

• Po importojmë më shumë kafshë të gjalla për mish, kryesisht nga Greqia…
• Eksperti Sinani: Qumështi shqiptar, më i miri sesa i Greqisë dhe i çdo vendi tjetër