Medaljet e fituara në mundje/ Kampionët kuqezi flasin për Euronews

Mundja shqiptare regjistroi një tjetër arritje në arenën ndërkombëtare pak ditë më parë, duke fituar dy medalje. Në kampionatin evropian të zhvilluar në Bukuresht, Zelimkhan Abakarov konfirmoi potencialin e tij, madje si një kandidaturë që mund të bëjë mirë dhe në lojërat olimpike, por surpriza padyshim ishte Islam Dudaev.

Ky i fundit arriti të fitojë medaljen e arit, duke u shpallur kampion, ndryshe nga Abakharov që u rendit i dyti.

Kreu i federatës shqiptare të mundjes, Sahit Prizreni për Euroneës Albania vlerësoi arritjet e dy sportistëve.

“Jam shumë krenar jo vetëm për rezultatet, por për punën e bërë prej tyre gjatë kësaj kohe. Një model në shoqëri, stërvitje”-tha Sahit Prizreni-President i Federatës së Mundjes.

Shqipëria ishte shumë pranë fitimit të medaljes së dytë të arit.

“Kur je afër 2 medaljeve të arit ndjen keqardhje, por Zelimkhan garoi në një peshë tjetër, për mua është kampion”- u shpreh Prizreni.

Edhe dy kampionët kuqezi u shprehën të lumtur për arritjet e tyre.

“Sigurisht që doja të fitoja medaljen e arit, sepse vitin e fundit kisha marrë një prej argjendi, por ja që ndodhi dhe fitova sërish një medalje argjendi”-theksoi Zelimkhan Abakarov

“Jam shumë i lumtur që munda të shpallem kampion Europe. Ky është trofeu im më i rëndësishëm në 29 vite, kjo pasi karriera ime ka qenë e pasuksesshme. Kam tentuar të dorëzohem, por presidenti Sahit Prizreni besoi tek mua, më motivoi dhe jam i lumtur. Falenderoj shqiptarët që më mbështesin, do ta tregoj veten dhe në kompeticione të tjera”-tha Islam Dudaev.

LEXONI GJITHASHTU: 

• Demokratja: E kisha sekretar Bardhin, na mësonte të mos shkonim te Berisha…
• Vrasja e pilotit të dezertuar rus në Spanjë, e tradhtoi telefonata e ish-të dashurës