Mehmeti: Abazoviç po dëmton interesat e shqiptarëve në Mal të Zi

Kryetari i Lidhjes Demokratike në Malin e Zi, Saubih Mehmeti thotë se marrëveshja e nënshkruar nga kryeministri në detyrë, Dritan Abazoviç për Kishën Serbe po destabilizon vendin.

Në një intervistë për Euronews Albania, Mehmeti u shpreh se në trevat ku shqiptarët janë shumicë dhe autoktonë, do të atakojë politika e Kishës Serbe, ku mund të marrë në pronësi kisha të tjera.

Sipas tij, vendi ka nevojë për zgjedhje të parakohshme.

“Kur vjen situata te Kisha Serbe, blloku pro-serb do të mbështesë çdo individ i cili ndihmon në atë drejtim. Jo vetëm për Malin e Zi, por është një dëm i madh që i bëhet pakicave, veçanërisht shqiptarëve në Malin e Zi. Në të gjitha trevat ku janë shqiptarët shumicë dhe autoktonë, do të atakojë politika e Kishës Serbe, për kalimin në pronësi të kishave që nuk ka qenë asnjëherë në pronësi të tyre.

Mënyra e nënshkrimit të asaj marrëveshjeje nuk ka qenë korrekte, nuk ka pasur transparencë dhe kjo e ka rënduar edhe më tepër situatën. Duhen zgjedhjet e parakohshme. Blloku por-serb është ai që destabilizon Malin e Zi, pres një reflektim edhe nga qytetarët”, theksoi ai.