Meta sulmon Ramën, i nxjerr karikaturën e publikuar në revistën komuniste

Ilir Meta ka publikuar në faqen e tij në Facebook një foto nga revista “Në shërbim të popullit” (organ i ministrisë së Brendshme) në vitin 1983, ku duket një karikaturë e punuar nga Edi Rama.

“Partia e Punës e kishte Edi Ramën karikaturistin e preferuar të shkrimeve propagandistike kushtuar Sigurimit dhe spiunazhit,” – shkroi kreu i Partisë së Lirisë.

Meta u shpreh se do të fokusohen te afera e inceneratorëve për të zbardhur grabitjet e Ramës dhe për t’i dhënë ndëshkimin e merituar.

Kujtojmë se Autoriteti i Dosjeve përmend ish-presidentin Ilir Meta në dokumentin që figuron në dosjet e Sigurimit të Shtetit.

Ai akuzohet se ka spiunuar shokun e tij i cili ka dashur të largohej nga vendi.

Meta e cilësoi autoritetin e dosjeve të kriminalizuar teksa e cilësoi absurde që pas 30 e ca vjetësh të dalë që ai ka qenë pjesë e ish-sigurimit, ndërkohë që siç tha ai i kishte të gjithë filtrat që nga 92 kur u bë deputet.

Sipas Metës, me këtë akt po synohet të zhvendoset vëmendja nga afera e inceneratorëve dhe skandalet e tjera të qeverisë.

Ndërkohë më herët, kryetari i Partisë Demokratike, Sali Berisha u shpreh se kryeministri Edi Rama ka keqpërdorur Shërbimin Informativ dhe Autoritetin e Dosjeve, për të sulmuar ish-presidentin Ilir Meta.

Në një deklaratë për mediat, Berisha u shpreh se personi me inicialet I.M, për të cilin i është dërguar një e-mail Aurotitetit të Dosjeve, me pretendimin se ka qenë bashkëpunëtor me Sigurimin e Shtetit, është Ilir Murati.

LEXONI GJITHASHTU:

• Pjesë e dosjeve të ish-Sigurimit të Shtetit, reagon Ilir Meta