Metaj mohon lidhjet me grupin e “Flakë në det”: Akuza është e padrejtë

Në seancën gjyqësore për operacionin “Flakë në det”, ish-shefi i Komisariatit të Kurbinit, Dritan Metaj, mohoi para Gjykatës së Posaçme Kundër Korrupsionit dhe Krimit të Organizuar (GJKKO) çdo lidhje me grupin e Gëzim Çelës dhe i cilësoi si të pabaza akuzat e SPAK për trafik droge.

Metaj deklaroi se “akuza e SPAK ndaj meje është e padrejtë dhe e pabazë” dhe theksoi se nuk kishte asnjë përfshirje në trafik droge. Ai shtoi se gjatë drejtimit të komisariatit, bashkëpunimi me Guardia di Finanza ka rezultuar në asgjësimin e qindra parcelave me kanabis, duke u angazhuar në luftën ndaj krimit në zonën e Laçit.

Avokati i tij, Ardian Kalia, kërkoi rikualifikimin e akuzës në shpërdorim detyre, duke argumentuar se Metaj nuk kishte dijeni apo domosdoshmëri për të arrestuar një person në kërkim.

Operacioni “Flakë në det”, i zhvilluar nga Prokuroria e Posaçme Antikorrupsion në gusht 2023, zbuloi një rrjet të trafikut të drogës përmes rrugës detare, ku të akuzuar ishin Gëzim Çela dhe dy shtetas ukrainas që dyshohet se kanë përdorur një velier për të transportuar drogë nëpërmjet ujërave neutrale.

LEXONI GJITHASHTU:

• “16 vite burg për Baronin”- SPAK jep pretencën për operacionin “Flakë në Det”
• “Flakë në det”, GJKKO pranon gjykim të shkurtuar për Gëzim Çelën dhe 11 të tjerë