“Metamorfoza”, SPAK kërkon 14 vite burg për biznesmenin dhe 9 për ish-shefin e policisë

SPAK ka rilexuar këtë të enjte pretencën për të akuzuarit e dosjes “Metamorfoza”, biznesmenin Pëllumb Gjoka dhe ish-shefin e policisë Ardit Hasanbegaj sa i përket pjesës për krimet e lehta, pasi çështja e tyre u veçua nga të pandehurit e tjerë.

Të dy po gjykohen me gjykim të shkurtuar për veprat penale: sigurim kushtesh dhe mjetesh për të kryer vrasje, grup kriminal dhe armëmbajtje pa leje.

Në pretencën e saj, Prokuroria e Posaçme rikonfirmoi qëndrimin e mbajtur edhe në qershor të vitit 2025, duke kërkuar 14 vite burg për biznesmenin Pëllumb Gjoka dhe 9 vite burg për ish-shefin e policisë Ardit Hasanbegaj.

Nëse shpallen fajtorë, ata përfitojnë nga gjykimi i shkurtuar, çka nënkupton uljen e 1/3 së dënimit ndërsa seanca e radhës u shty për më 9 mars, kur priten konkluzionet e avokatëve mbrojtës.

Ndërkohë, biznesmeni Pëllumb Gjoka, së bashku me disa të pandehur të tjerë, po gjykohet me procedurë të zakonshme në një tjetër dosje të “Metamorfozës” sa i përket krimeve të rënda, që lidhet me vrasjen e Gjin Ndojit, i njohur edhe me mbiemrin Boriçi.

Ardit Hasanbegaj dhe Pëllumb Gjoka