Mexhiti shpall fitoren në Çair: Ali Ahmetin e dërguam në pension politik

Në selinë e koalicionit VLEN në komunën e Çairit me shumicë shqiptare ka nisur festa pas mbylljes së procesit të votimit lidhur me zgjedhjet lokale në Maqedoninë e Veriut.

Në fjalimin e tij para mbështetësve, Izet Mexhiti shpalli fitoren në Çair ku u shpreh se kjo fitore i takon qytetarëve shqiptarë dhe jo individëve apo partive të veçanta. Ai e cilësoi rezultatin si një moment historik për ndryshim në skenën politike shqiptare në Maqedoninë e Veriut.

“Në Çair fituan shqiptarët. Dorëhiqu, Ahmeti. Vota e shqiptarëve të dërgoi në pension politik. Të uroj ditë të qeta pensioni,” tha ai duke iu drejtuar liderit të BDI-së, Ali Ahmeti.

Mexhiti theksoi gjithashtu se VLEN ka siguruar fitore në shumicën e komunave me shumicë shqiptare, duke e cilësuar këtë si fillimin e një epoke të re politike.

“Kjo fitore nuk është e imja apo e VLEN-it, por e shqiptarëve dhe e dinjitetit qytetar,” shtoi ai.

Në ngjarje mori pjesë edhe kryetarja e Preshevës, Ardita Sinani, e cila përgëzoi përmes pranisë së saj rezultatin e koalicionit opozitar shqiptar.