Ministeriali i Taorminës, Hasani: Zgjerimi i BE-së, zgjedhje strategjike për paqen

Në 70-vjetorin e Konferencës historike të Mesinës dhe Taorminës, një moment kyç në rrugëtimin drejt krijimit të Bashkimit Evropian, ministrat e Jashtëm të vendeve anëtare dhe kandidate u mblodhën për të reflektuar mbi të kaluarën dhe për të diskutuar të ardhmen evropiane në një kontekst të ri gjeopolitik.

Ministri për Evropën dhe Punët e Jashtme të Shqipërisë, z. Igli Hasani, mori pjesë në këtë ministerial, ku theksoi rëndësinë e zgjerimit të BE-së si një projekt i pambaruar dhe me rëndësi strategjike për paqen dhe stabilitetin në kontinent.

“Uroj që ky përvjetor i 70-të të jetë më shumë se një përkujtim – duhet të jetë një thirrje për guxim. Zgjerimi nuk është një barrë – është një premtim për paqe, për dinjitet, për një kontinent që refuzon të ndahet midis qendrave dhe periferive. Zgjerimi nuk është një proces administrativ, por një zgjedhje strategjike për paqen. Evropa nuk mund të jetë e plotë pa Ballkanin Perëndimor,” – deklaroi ministri Hasani.

Duke folur për rrugëtimin e Shqipërisë drejt anëtarësimit në BE, ministri theksoi:

“Për ne, rruga drejt Evropës nuk është çështje komoditeti, por një thirrje kombëtare. Shqipëria ka hapur 4 grup-kapituj në negociata dhe synon të hapë edhe dy të tjerë brenda këtij viti. Objektivi ynë është mbyllja e negociatave deri në vitin 2027 dhe anëtarësimi në BE deri në fund të dekadës.”

Ministri Hasani theksoi se angazhimi i Shqipërisë ndaj integrimit evropian është i palëkundur dhe se vendi vazhdon të luajë një rol aktiv në nismat rajonale dhe në mbështetje të vlerave evropiane.

“Rruga jonë drejt BE-së është e pandarë nga rrugëtimi i rajonit. Shqipëria vazhdon të jetë një aktor konstruktiv në promovimin e dialogut dhe stabilitetit. Por edhe angazhimi i BE-së ndaj Ballkanit Perëndimor duhet të jetë i besueshëm,” – shtoi ai.

Konferenca e Mesinës dhe Taorminës e vitit 1955 u bë gur themeli për Traktatet e Romës dhe më pas krijimin e BE-së. Kjo ngjarje përkujtimore në Taorminë shërben si një moment reflektimi dhe orientimi për të ardhmen e përbashkët evropiane.

LEXONI GJITHASHTU:

• Ministri i Jashtëm, Hasani njofton largimin e sigurtë të 5 shqiptarëve nga Izraeli
• Ministri i jashtëm Hasani takim “kokë më kokë” me homologun grek Gerapetritis