Ministri Balla takim me Sekretarin e Shtetit të Gjermanisë, Johann Saathoff

Ministri i Brendshëm Taulant Balla priti sot në takim një delegacion gjerman të kryesuar nga Johann Saathof, Sekretar Shteti në Ministrinë Federale për Punët e Brendshme dhe Komunitetet, me të cilin diskutoi çështjet e bashkëpunimit dypalësh si dhe tema që lidhen me takimin ministerial që zhvillohet nesër në Tiranë.

Sekretari i Shtetit Saathof konfirmoi mbështetjen e Gjermanisë Federale për të gjithë vendet e Ballkanit Perëndimor që janë pjesë e nismës së “Procesit të Berlinit” dhe vuri në dukje angazhimin e spikatur të Shqipërisë lidhur me problematikat e migracionit të parregullt.

Ministri Balla falënderoi palën gjermane për mbështetjen e dhënë deri më sot, sidomos sa i përket mbështetjes ndaj agjencive ligjzbatuese në luftën kundër krimit të organizuar.

Balla nënvizoi edhe bashkëpunimin e shkëlqyer që ekziston mes dy policive, Policisë së Shtetit dhe Policisë Federale të Gjermanisë, të cilat kanë zhvilluar disa operacione të përbashkëta, ndër më të njohurit është ai i quajtur “Anti-Skifter”.

Palët ranë dakord për nevojën e forcimit dhe thellimit të luftës kundër migracionit të parregullt dhe konsideruan që ministeriali i ditës së nesërme do të jetë një hap më tej në realizimin e këtij qëllimi.

Delegacioni gjerman do të marrë pjesë nesër në Ministerialin e Tiranës për çështjet e sigurisë dhe flukset migratore përmes Ballkanit Perëndimor.

LEXONI GJITHASHTU: 

• Zgjedhje në BE/ Ndikimi rus kërkon destabilizimin e procesit demokratik në Europë
• Dëshmia në SPAK/ Gazment Bardhi kërkon ndryshim të datës për shkak të agjendës