Ministri i Brendshëm serb: Ne e dimë se kush e ka vrarë Oliver Ivanoviçin

Ministri i Brendshëm i Serbisë, Bratisllav Gashiç, tha më 21 qershor se autoritetet serbe “e dinë saktësisht” se kush e ka vrarë Oliver Ivanoviçin, politikanin serb nga veriu i Kosovës.

“E dimë saktësisht se kush është vrasësi”, tha Gashiç, gjatë një fjalimi në një seancë të Parlamentit të Serbisë, që është thirrur nga opozita, e cila po kërkon shkarkimin e tij, raporton agjencia Beta.

Ai tha se policia serbe ka kërkuar nga autoritetet gjermane këtë person “nën mbrojtjen e të cilëve ai është”.

“Ne kemi një video nga aeroporti i Tiranës, kemi fotografi nga Prishtina, kemi fotografi që shfaq atë duke hyrë në një banesë në Prishtinë”, tha Gashiq, pa ofruar detaje apo dëshmi të tjera për të mbështetur këto pretendime.

Ai tha se ky rast “është zgjidhur nga profesionistët”, por ata nuk kanë pranuar imazhe satelitore të skenës ku u krye vrasja. Sipas ministrit serb, këto imazhe ishin kërkuar nga partnerët ndërkombëtarë, por këta të fundit ishin arsyetuar se në ditën e vrasjes “kishte qenë ditë me mjegull”.

Oliver Ivanoviç u vra më 16 janar 2018, me gjashtë plumba në shpinë. Vrasja u krye para zyrës së partisë së tij në Mitrovicë të Veriut, komunë e banuar me shumicë serbe në veri të Kosovës.

Mbi pesë vjet pas kësaj vrasjeje, rasti ende nuk është zgjidhur.

LEXONI GJITHASHTU:

• Shpërthim i fuqishëm në Paris, përfshihen nga flakët disa ndërtesa
• Flet për herë të parë kandidati që do garojë përballë Bashës për kryesinë e PD