Ministrja e Shëndetësisë në spitalin e Beratit, Sala: Do zgjerojmë gamën e analizave

Spitali Rajonal i Beratit po kryen rikonstruksion në disa shërbime të bllokut operator, ndërsa aktiviteti mjekësor vijon pa ndërprerje.

Sipas autoriteteve spitalore, stafi po përballon fluksin e pacientëve duke garantuar shërbimet bazë dhe ekzaminimet laboratorike gjatë gjithë periudhës së punimeve.

Gjatë një vizite në ambientet e spitalit, Ministrja e Shëndetësisë dhe Mirëqenies Sociale, Evis Sala, u ndal në laboratorin e analizave, ku u njoh nga afër me ecurinë e shërbimeve diagnostikuese.

Në bisedë me personelin, ajo theksoi se është rritur numri i analizave, kryesisht për shkak të shtimit të rasteve me sëmundje kronike, çka ka sjellë ngarkesë më të lartë pune për laboratorët.

Ministrja u shpreh se ekzaminimet laboratorike vijojnë të kryhen çdo ditë, me prioritet për rastet urgjente.

Sipas saj, po shqyrtohet edhe mundësia për zgjerimin e gamës së analizave, përfshirë disa tregues molekularë, në bashkëpunim me specialistë të fushës.

Punimet në infrastrukturë dhe ndërhyrjet në shërbime pritet të vijojnë në funksion të përmirësimit të kushteve në spital.