“Mirdita në fotografi”, çelet në Tiranë ekspozita kushtuar traditave të zonës

U çel në “Europe House”, në Tiranë, ekspozita “Mirdita në Fotografi” e cila përmban punime në mediumin e fotografisë së dokumentuar të artistes dhe fotografes Nadia Abazi, si dhe fotografi të kullave të zonës së Mirditës të realizuara nga dashamirës të trashëgimisë.

Një hapësirë e veçantë ekspozitive i është kushtuar vendit të kujtesës kolektive të burg-kampit të Spaçit me video-instalacionin e titulluar “Saharaja” të artistes ndërdisiplinore vizuale, Abi Shehu.

Gjithashtu, u ekspozuan punime artizanale tradicionale të artizaneve të Mirditës, mes te cilave, artizanet veçojnë xhupin i cili përmban simbole 2000-vjeçare, si dhe çiftelia dhe sharkia të krijuara nga Gëzim Përshqefa, mjeshtër i prodhimit të këtyre instrumenteve muzikore tradicionale.

U prezantuan po ashtu tre itinerare digjitale të përgatitur nga eksperti i guidave Lytfi Alliu, të përshtatura në harta grafike nga “Trivet”.

Pjesëmarrësit u ftuan të degustojnë gastronominë tradicionale mirditore, mes te cilave byreku me arra dhe lëngu i shegës.

“Mirdita në Fotografi”, do të qëndrojë e hapur për publikun deri më 15 janar.

LEXONI GJITHASHTU:

• Ekspozita në prag të festave, punimet artizanale të Elbasanit në Muzeun Etnografik
• Çelet ekspozita grafike në Fier, vajzat e Mustafa Arapit vazhdojnë traditën