Mjegulla, ndikim në shëndet! Mjekja: Pacientët me astmë duhet të bëjnë kujdes

Korça po përjeton ditët e fundit ulje të temperaturave, të shoqëruara me prezencën e mjegullës, kryesisht gjatë orëve të para të mëngjesit. Kjo situatë sjell probleme të ndjeshme për personat që vuajnë nga sëmundjet e mushkërive, thotë mjekja pneumologe Diana Aliçkolli.

“Kjo është një klimë e pafavorshme për pacientët kronikë, specifikë për specialitetin tonë. Është e rrezikshme edhe për sëmundje të tjera, por për patologjitë e mushkërive është një nga faktorët më të pafavorshëm klinikë, pasi shoqërohet me vështirësi në frymëmarrje dhe infeksione të përsëritura.”- shprehet Diana Aliçkolli, pneumologe.

Mjekja këshillon që personat që vuajnë nga këto sëmundje të shmangin daljet në orët e mëngjesit dhe të mbrëmjes, për shkak të ndotjes së ajrit dhe tymit në qytetin e Korçës, si dhe të evitojnë grumbullimet e njerëzve.

“Pacientët duhet të mos dalin në orët e para të mëngjesit dhe në mbrëmje. Në këtë periudhë kemi edhe tymin karakteristik të Korçës, i cili shtohet me uljen e temperaturave. Aktualisht po hasim raste me temperaturë dhe viroza stinore, ndaj duhet të bëjnë kujdes nga ambientet e mbipopulluara, eventet dhe grumbullimet. Kjo ndihmon që të shmangen shtrimet në spital dhe të kemi më pak raste akute, sidomos pneumoni që zakonisht shtohen nga janari.”-shprehet Diana Aliçkolli, pneumologe.

Numri i pacientëve të shtruar në sanatoriumin e Korçës mbetet i qëndrueshëm, ndërsa vihet re një rritje e rasteve me viroza sezonale.

LEXONI GJITHASHTU:

• Ngordhje masive e shpendëve, rrezik për shëndetin publik
• Shtyhet seanca, Veliaj: Standard i dyfishtë, Metës iu dha dosja mua jo