Mjeku Ylli: Mund të shtohen kategoritë për vaksinim të detyruar nëse do jemi në kushte risku

Anëtari i Komitetit Teknik të Ekspertëve, Alban Ylli tha për Euronews Albania se nuk është çudi që në të ardhmen në Shqipëri të shtohen kategoritë për t’u vaksinuar me detyrim.

“Nuk ka diskutime zyrtare mbi shtimin e grupeve të tjera, por po ndjekim me vëmendje se çfarë po ndodh në vendet perëndimore. Atje po shtyhen dhe po zgjaten masat e mandatimit të rregullimit për vaksinimin e grupeve të veçanta dhe po bëjnë përpjeke për t’a zgjeruar në grupe të tjera. Nuk do të ishte çudi që edhe Shqipëri të shtohej për diskutim ky në kushtet e nivelit të riskut”, tha mjeku.

Ai nënvizoi se faktori kryesor i shkaktimit të imunitetit me 73% në popullatën shqiptare është vaksina.

“Ne tashmë i dimë më qartë, përmasat reale të popullatës krejtësisht të pambrojtur shumë të rrezikuar në Shqipëri dhe për arsye nënvizojmë me forcë rekomandimin që duhet të vijojë me intensitet vaksinimi i popullatës shqiptare”, u shpreh ai.

“Brenda vjeshtës duhet të përpiqemi që të realizojmë edhe 500 mijë vaksinime të tjera”, shtoi mjeku.

Sa i përket dozës së tretë të vaksinës, mjeku rekomandoi që në Shqipëri do të jetë e nevojshme një dozë e tretë.

“Në fund të shtatorit ose fillim të tetorit të merrej në konsideratë një rekomandim i tillë për grup-mosha të caktuara”, përfundoi ai.

LEXONI GJITHASHTU:

• Fëmijët, rezervuar i madh i qarkullimit të virusit në popullatë, thotë eksperti i shëndetësisë