“Mos ki frikë nga vota, dil para votave të popullit”, Çepani debat me Bylykbashin

Deputeti i Partisë Demokratike Oerd Bylykbashi dhe Edlira Çepani bashkëthemeluese e “Shqipëria Bëhet” kanë debatuar këtë të mërkurë në “Now me Erla Mëhillin” në Euronews Albania, lidhur me dakordësinë e Partisë Demokratike dhe asaj Socialiste për reformën zgjedhore.

Sipas Çepanit miratimi i kësaj reformë u vlen servilëve të partisë e jo personave të cilët kanë vërtet votat e popullit.

“Nuk është e qartë në pjesën e listës së mbyllur a do arrijnë njerëzit të votojnë në mënyrë preferenciale, do e shohim se sa vota ka kandidati Oerd Bylykbashi, i dyti në Durrës apo nuk do arrijmë të shikojmë asnjëherë se sa vota marrin këta? Ne sot për shkak të listës së mbyllur kemi njerëz që janë jashtë parlamentit me 6000 vota dhe brenda parlamentit me 400 vota, kjo gjë nuk e rrit garën brenda partive.

Mua nga ky regres më vjen të uroj të gjithë servilët brenda partive. Urime është koha juaj dhe ngushëlloj të gjithë ata njerëz brenda partive që nuk servilosen por kanë mbështetjen e elektoratit të cilët fatkeqësisht nuk do kenë mundësi”,-tha Edlira Çepani.

Bylykbashi tha se kjo është një çështje logjike, pasi në asnjë sistem sipas tij nuk ndodh që pjesa e mbyllur e listës të votohet në mënyrë nominale.

“Në asnjë lloj sistemi nuk ekziston as logjikisht dhe as teknikisht që pjesa e mbyllur të votohet në mënyrë nominale, pasi votohen partitë politike dhe partitë politike janë mekanizmi që rekruton njerëz, i bën anëtar, i angazhon, i ngre në rangjet e veta, i vendos në pozicione, konsumohen politikisht në sy të të gjithëve për një periudhë të gjatë dhe ata marrin përsipër edhe të drejtojnë partinë drejt fitores”,-tha Bylykbashi.

Çepani ndërhyri duke thënë se kjo gjë nuk e ka penguar Kosovën, ndërsa i tha Bylykbashit se nuk duhet të ketë frikë nga vota.

Pjesë nga debati:

Edlira Çepani: Kjo nuk ka penguar në rastin e kosovës, pse keni frikë nga vota? Mos kini fikë nga vota. Vota ju lidh me popullin, jo me kryetarët. Autokracia brenda partive është gjëja që po luftojmë prej shumë kohësh.

Oerd Bylykbashi: Nëse do isha në studio do më dëgjonit shumë gjatë. Por kush ka frikë nga vota. votohen partitë politike votohen edhe individët, përgjegjësinë më të madhe e kanë gjithmonë partitë politike. Sistemi ynë i ngjan sistemit gjerman.

Deputeti Bylykbashi tha se reformë zgjedhore nuk ka pasi sipas tij kryeministri Rama refuzon çdo opsion për të ndryshuar sistemin zgjedhor, por u trajtua vendimi i Gjykatës dhe u arrit që shqiptarët të votojnë nga jashtë.

LEXONI GJITHASHTU:

• A do kandidoje në pjesën e pasigurt të listës në Durrës? Mëhilli pyet Bylykbashin
• Arrihet marrëveshja PS-PD për “Zgjedhoren”, Euronews Albania siguron tekstin e plotë