Moska nis hetimet për ‘Bucha-n’: Inskenim për të diskredituar ushtrinë ruse

Kryetari i Komitetit Hetimor të Rusisë, Alexander Bastrykin, udhëzoi agjencinë e tij të hënën të analizojë raportet për vrasjet e civilëve në Bucha, në periferi të Kievit, raportoi CNN.

“Sipas informacioneve tona, me qëllim diskreditimin e personelit ushtarak rus, Ministria e Mbrojtjes e Ukrainës shpërndau në mediat perëndimore video të filmuara në qytetin Bucha, rajoni i Kievit, si dëshmi e masakrës së civilëve”, lexohet në një deklaratë të Komitetit Hetimor.

Imazhet tronditëse të trupave të civilëve të gjetur në rrugët në Bucha, pas tërheqjes së forcave ruse, kanë shkaktuar reagime të shumta ndërkombëtare.

Ministri i Brendshëm i Ukrainës tha të hënën se ai priste që numri i trupave të civilëve të gjetur në rajonin e Kievit të shkonte në qindra, duke cituar informacione paraprake.

Komiteti Hetimor i Rusisë ka një histori hetimesh të motivuara politikisht, duke përfshirë ndjekjen e çështjeve penale kundër liderit të opozitës ruse, Alexey Navalny. Mbrojtësit e të drejtave të njeriut i kanë përshkruar ato hetime si një fushatë të persekutimit politik të fshehtë.

LEXONI GJITHASHTU:

• Banorët e Buchas rrëfejnë makthin e përjetuar nga sulmet ruse
• Macron kërkon më shumë sanksione ndaj Rusisë për masakrën në Bucha