Moti keq, ministria e Mbrojtjes raporton gjendjen: Ja situata në bashkitë e vendit

Ministria e Mbrojtjes ka raportuar lidhur me situatën në bashkitë vendit pas reshjeve të shiut ku janë krijuar problematika në disa zona. Ministria thekson se strukturat e emergjencave civile, nën koordinimin e Agjencisë Kombëtare të Mbrojtjes Civile, janë angazhuar për të ndihmuar qytetarët.

Për shkak të pranisë së ujit në banesa, është kryer evakuimi i një familje prej 5 anëtarësh nga ekipet e Forcave të Armatosura në fshatin Dukagjin i Ri, Thumanë. Në Zejmen, si pasojë e vërshimit të përrenjve të Prullit dhe Pllanës, ka prani uji në 4 banesa. Banorët janë akomoduar përkohësisht nga strukturat vendore. Forcat e emergjencave kanë kryer tërheqjen e ujit dhe pastrimin fillestar të ambienteve të prekura.

Po vijon puna në terren për eliminimin e pasojave të reshjeve në njësitë Sukth, Katund i Ri dhe Ishëm. Niveli i ujit në lumenjtë Erzen dhe Ishëm është brenda kuotave normale. Hidrovorët e Porto Romanos dhe Hamallaj vijojnë punën me kapacitet të plotë.

Në qarkun e Dibrës situata paraqitet e qetë, përveç mungesës së energjisë elektrike në njësitë Kala e Dodës, Sllovë, Zall Dardhë, Reç, Lurë dhe pjesërisht në Arras e Fushë Çidhën. Në Kurbin vijon puna për normalizimin e situatës në Mamurras dhe fshatrat Gjorëm, Zhejë dhe Fushë Mamurras. Në fshatin Shpërdhe, rruga është dëmtuar nga ujërat e lumit Droje.

Puna vijon edhe në segmentin Skuraj-Gallatë-Vinjollë, i cili mbetet i bllokuar për shkak të dëmtimit të urës mbi lumin Vinjollë. Nivelet e ujit në lumenjtë Drin dhe Mat janë brenda kuotave.

Në qarkun e Kukësit ka rënie inertesh në disa akse rrugore, dhe kompanitë kontraktore po punojnë për pastrimin e tyre. Segmenti Vranisht-Fajza është dëmtuar si pasojë e reshjeve.

Në Shkodër vijon pastrimi i inerteve në segmentin Gimaj–Bregu i Lumit nga trupat e FA dhe punonjësit bashkiakë. Segmenti Ndërlysë–Breg Lumi mbetet i bllokuar; po punohet për hapjen e tij.

Në qarkun e Elbasanit nuk ka raportime për problematika, përveç rënies së inerteve në segmentet Elbasan–Librazhd dhe Elbasan–Rrogozhinë, të cilat po pastrohen nga operatorët e mirëmbajtjes.

Ekipet e OSHEE po punojnë për rikthimin e energjisë në disa fshatra të Rubikut, në fshatrat Torocish, Kukës, Berishë dhe Lekbibaj të Tropojës, në njësitë Kurvelesh, Zagori, Luftinjë dhe Dropull i Poshtëm dhe disa njësi administrative të Qarkut Korçë. Në qarqet e tjera të vendit nuk raportohen problematika.

LEXONI GJITHASHTU:

• Eminem padit kompaninë australiane Swim Shady për ngjashmëri me Slim Shady
• Sulmet në tregjet e Krishtlindjeve, Merz bën thirrje për masa të shtuara sigurie