Murati: Berisha dhe Basha bashkëfajtorë, PD 8 vjet me vonesë për debatin mes dy liderëve

Erl Murati tha në studion e “Barometrit” se demokratët janë të pakënaqur si me kreun aktual të PD-së Lulzim Basha, si me ish-kryeministrin Berisha.

Për kryeredaktorin e “Gazetës Shqiptare”, tani nuk është koha e përshtatshme që të ketë një debat midis dy liderëve të së njëjtës parti, pasi ky debat po bëhet tetë vite me vonesë.

Për ta paralelizuar, Erl Murati përdori shembullin e Partisë Socialiste në vitin 2005, ku atëherë mund të diskutohej nëse më i pëlqyeshëm për publikun ishte Fatos Nano apo Edi Rama që sapo kishte marrë partinë, gjë që do të ishte normale edhe për Partinë Demorkatike në momentin që i kaloi Lulzim Bashës, por jo tani pas 8 vitesh.

“Gjatë këtyre 8 viteve Lulzim Basha është perceptuar si kryetari de-juro i PD-së dhe Sali Berisha si kryetari de-facto, ndaj një pjesë e elektoratit të PD-së i quan këta të dy fajtorë për humbjen e PD-së”, u shpreh Erl Murati.

Erl Murati tha se kur Lulzim Basha u bë kryetar i PD-së, Sali Berisha ka pretenduar që Basha do të bënte çdo veprim sipas vullnetit të ish-kryeministrit.

“Tani vendimin e parë që merr Lulzim Basha kundër dëshirës së Sali Berishës, ai e sulmon”, tha z. Murati.