Naftëtarët e Marinzës 13 ditë në grevë urie, përkeqësohet gjendja shëndetësore

Naftëtarët e kompanisë Bankers Petroleum në Marinzë ndodhen në ditën e 13-të të grevës së urisë, ndërsa gjendja e tyre shëndetësore është përkeqësuar ndjeshëm.

Vetëm pak minuta më parë, dy prej grevistëve, Eduart Mita dhe Bledar Dano, kanë shfaqur probleme shëndetësore.

Ekipi mjekësor ka mbërritur menjëherë pranë Zyrave të Sektorit Hidrokarbur në Marinzë, ku u është dhënë ndihma e parë dhe kanë marrë trajtim me injeksione.

Më herët gjatë javës, përkeqësimi i gjendjes së dy prej grevistëve të tjerë bëri që ata të tërhiqeshin nga protesta, duke e reduktuar në tetë numrin e punonjësve që vazhdojnë grevën e urisë.

Naftëtarët kanë paralajmëruar se nuk do të tërhiqen nga protesta deri në plotësimin e kërkesave të tyre, ndërsa autoritetet vendore po monitorojnë nga afër situatën shëndetësore të grevistëve.

Punonjësit kanë hyrë në grevë në shenjë proteste ndaj mosplotësimit të kërkesave të tyre për rritje pagash dhe përmirësim të kushteve të punës nga ana e kompanisë.

LEXONI GJITHASHTU:

• Naftëtarët e Marinzës prej 8 ditësh në grevë për rritje pagash
• Në grevë prej 9 ditësh, përkeqësohet gjendja e tre naftëtarëve