Napoli, kampion i Serie A pas 33 vitesh

Skuadra e Napolit barazoi sot me Udinesen 1:1 në stadiumin “Dacia Arena”, barazim ky i cili i mjaftoi që të shpallet kampion i Serie A.

Ky është  titulli i tretë që fiton Napoli dhe i pari pas 33 vjetësh.

Pas dy titujve në shekullin e kaluar (1986/87 dhe 1989/90), ajo që u bë nga brezi i Diego Armando Maradonës u përsërit nga Luciano Spalletti pesë ndeshje para fundit të Serisë A.

Heroi i napoletanëve është Victor Osimhen, i cili barazoi rezultatin në 1:1 në minutën e 52’ të ndeshjes, ndërsa Udinese kryesonte 1:0 falë golit të Sandi Lovric në minutën e 13’.

Me pikët e reja, Napoli ngjitet në kuotën e 80 pikëve, 16 më shumë se Lazio në vendin e dytë, kur kanë mbetur edhe pesë ndeshje deri në fund të kampionatit. Kjo gjë nënkupton se matematikisht Napoli siguron titullin e Serie A.