NATO dënon sulmin e Iranit ndaj Shqipërisë

NATO ka dënuar sulmin kibernetik të Iranit ndaj Shqipërisë. Përmes një deklarate, Aleanca e Atlantikut të Veriut shprehet se aleatët mbështesin Shqipërinë në forcimin e aftësive të saj të mbrojtjes kibernetike për të përballuar dhe zmbrapsur aktivitete të tilla keqdashëse kibernetike në të ardhmen.

“Ne qëndrojmë në solidaritet me Shqipërinë pas sulmit të fundit kibernetik në infrastrukturën e saj kombëtare të informacionit. Aleatët pranojnë deklaratat e Shqipërisë dhe aleatëve të tjerë që ia atribuojnë përgjegjësinë për sulmin kibernetik Qeverisë së Iranit. Ne dënojmë fuqishëm aktivitete të tilla keqdashëse kibernetike të krijuara për të destabilizuar dhe dëmtuar sigurinë e një aleati dhe për të prishur jetën e përditshme të qytetarëve. NATO dhe aleatët mbështesin Shqipërinë në forcimin e aftësive të saj të mbrojtjes kibernetike për të përballuar dhe zmbrapsur aktivitete të tilla keqdashëse kibernetike në të ardhmen”, thuhet në deklaratën e Aleancës së Atlantikut të Veriut.

Përmes një postimi në Twitter kreu i aleancës, Jens Stoltenberg shprehet se NATO është e përkushtuar të vazhdojë të rrisë sigurinë për të penguar dhe mbrojtur kundër kërcënimeve kibernetike.

“Dënoj fuqishëm sulmin e fundit kibernetik ndaj Shqipërisë, të cilin Tirana dhe aleatët e tjerë ia atribuojnë Iranit. NATO dhe ekspertët e Aleatëve po ofrojnë mbështetje. NATO është e përkushtuar të vazhdojë të rrisë sigurinë për të penguar dhe mbrojtur kundër kërcënimeve kibernetike”, shprehet Stoltenberg.

I strongly condemn the recent cyber attack on #Albania, which Tirana & other Allies have attributed to Iran. #NATO & Allied experts are providing support. NATO is committed to continue raising our guard: to deter, defend against & counter cyber threats. https://t.co/JoH2cEqNzp

— Jens Stoltenberg (@jensstoltenberg) September 8, 2022

Një ditë më parë SHBA dhe Britania i dolën në krah Shqipërisë për vendimin e marrë për dëbimin e diplomatëve të Republikës Islamike që u gjet përgjegjëse për sulmin kibernetik të meskorrikut në vendin tonë.

Ambasada iraniane u boshatis sot pas ultimatumit të dhënë një ditë më parë nga kryeministri Edi Rama që i la 24 orë stafi diplomatik i ambasadës së Republikës Islamike të Iranit të largohet brenda 24 orëve nga Shqipëria.

Rama deklaroi se ky vendim i Këshillit të Ministrave, vjen pas u zbulua se pas sulmit kibernetik të 15 korrikut, qëndron Republika Islamike e Iranit.

LEXONI GJITHASHTU:

• Dëbimi i diplomatëve iranianë, Denaj: Vendimi i duhur për të ruajtur integritetin
• Përfundon pas 3 orësh kontrolli në ambasadën iraniane, godina do ruhet nga policia