Ndërpritet marrja në pyetje e të dyshuarit kryesor për “zhvatjen”, merret nga ndihma e shpejtë

Prokuroria për luftimin e krimit të organizuar dhe korrupsionit në Shkup mori sot në pyetje të dyshuarin kryesor në rastin “Zhvatja”, ish shoumenin Bojan Jovanovskin.

Marrja në pyetje e Bojan Jovanovskit zgjati shumë pak, pasi që gjysmë ore pasi e sollën nga burgu hetues i Shkupit, gjendja e tij shëndetësore u përkeqësua. Ndihma e shpejtë erdhi menjëherë, dhe e morri për ta dërguar në spital, në shoqërim edhe të makinës së burgut që i shkonte nga pas.

Avokati i Jovanovskit, Sasho Dukovski tha se ishte tmerruar kur e kishte parë klientin në atë gjendje, me të vjella dhe marramendje.

“Secili njeri ka të drejtë që të jetojë, pasi kjo është një e drejtë elementare. Mendoj se secilit duhet t’i ofrohet ndihma adekuate mjekësore. Deri më tani klienti im ka qenë më shumë se njëzetë herë në mjek specialist, dhe ata i kanë rekomanduar shtrirje në spital”, tha avokati Dukovski.

Bojan Jovanovski do te duhet të japë dëshmi ndonjë ditë tjetër, ndërsa ish prokurorja speciale Katica Janeva, siç kemi mësuar nga avokatja e saj, do të mbrohet me heshtje deri në fillimin e gjykimit.  

Deri në fund të kësaj jave prokurorët kanë paralajmëruar përfundimin e hetimit dhe ngritjen e akuzës, pas çka do të dihet saktë se me çfarë ngarkohen të dyshuarit për “Zhvatjen”, korrupsionin 8 milion eurosh me të cilin biznesmeni i dyshuar në rastet e Prokurorisë Speciale, do të duhej ta blente lirinë.