Ndërtimet pa leje, Koçiu: Operacioni po vijon me rezultate të prekshme

Ministrja e Punëve të Brendshme, Albana Koçiu ka bërë të ditur këtë të hënë se operacioni për vendosjen e ligjshmërisë në fushën e ndërtimit, i nisur në fillim të nëntorit në zonën e Farkës, po vijon dhe rezultatet janë të prekshme.

Sipas saj, në çdo kantier ku konstatohet shkelje, mesazhi është i qartë, “askush nuk është mbi ligjin”.

“As pronarët e vilave, pallateve apo komplekseve, as zaptuesit e zakonshëm dhe as më keq, inspektorë apo funksionarë që kanë abuzuar me detyrën, nuk janë mbi ligjin” u shpreh Koçiu.

Ndërkohë, në vetëm një javë janë inspektuar 65 objekte, përfshirë vila dhe banesa kolektive, ndërsa janë prishur menjëherë 2.736 m² ndërtim pa leje. Gjithashtu, janë vendosur gjoba me vlerë totale 1 milionë euro, ndërsa për 18 persona, mes tyre 13 inspektorë, ka nisur procedimi penal.

“Operacioni do të vazhdojë për aq kohë sa të jetë e nevojshme. Që çdo lek i investuar nga qytetarët të përkthehet në pronë me cilësinë, planimetrinë dhe standardet e premtuara, dhe çdo pëllëmbë e zaptuar të kthehet në shërbim të komunitetit”, shtoi Koçiu.

Sipas saj, ky operacion është pjesë e një procesi të gjerë institucional për zbatimin e ligjit, rikthimin e besimit të qytetarëve tek shteti dhe garantimin e një zhvillimi të drejtë urban në gjithë vendin.

LEXONI GJITHASHTU:

• Ndërtimet pa leje, Koçiu: Askush s’është mbi ligjin, kujdes dokumentet e pronësisë
• Koçiu bën bilancin: Më pak vrasje, më shumë goditje ndaj paligjshmërisë