Ndeshjet e kthimit në Champions League, Ballkani synon kualifikimin

Ballkani beson se mund ta kalojë pengesën Santa Coloma, të cilën ia doli ta mposhtë në ndeshjen e parë në shifrat 2-1. Skuadra kampione e Superligës së Kosovës, luan pasditen e kësaj të marte ndeshjen e kthimit në shtëpi, ndërsa gjithcka është gati, me trajnerin Ilir Daja që beson se mund të kalojë më tej. Përgatitjet kanë marrë fund, ndërsa është kryer dhe stërvitja e fundit mbrëmjen e së hënës.

Situata paraqitet pozitive, ndërsa kualitetet nuk mungojnë, gjë të cilën Ballkani e konfirmoi dhe në ndeshjen e parë, ku arriti të përmbysë avantazhin paraprak të kundërshtarit. Hyrja do të jetë falas për të gjithë tifozët, me duelin që gjen vend në “Zahir Pajaziti” të Podujevës.

Në rast fitore, kampionët e Kosovës do të kenë përballë një tjetër ekip të vështirë, në raundin e dytë kualifikues, e bëhet fjalë për Midtjylland. Në mbrëmje në fushë do të zbresë dhe Decici, ekipi i Malit të Zi. Këta të fundit i kanë më të vështira llogaritë, e thuajse janë të dorëzuar nga gara në kompeticionin e më të mirëve. Përballja e luajtur në Uells u mbyll në shifrat 3-0 për TNS dhe gjasat për një kalim më tej janë të pakta.