Bashkimi Evropian do të ofrojë mbështetje emergjente për Shqipërinë dhe Greqinë, që prej disa javësh po luftojnë me zjarret.

Mbështetja për Greqinë do të konsistojë në dhënien e mjeteve tokësore dhe ajrore, që do të garantohen nga vende të tjera evropiane në kuadër të Mekanizmit Evropian për Mbrojtjen Civile.

“Për rajonin e Atikës në Greqi, Komisioni ka angazhuar dy mjete nga Italia, një helikopter nga Franca dhe një tjetër helikopter nga Serbia. Gjithashtu do të dërgohen forca në terren nga 5 vende evropiane; ato janë Çekia, Italia, Franca, Serbia dhe Rumania. Këto janë veçmas zjarrfikësve që janë dërguar në Greqi në fillim të sezonit”, tha Balazs Ujvari, zëdhënës i Komisionit Evropian.

Ndërsa Shqipëria do të marrë një avion multifunksional nga Rumania, i cili mund ta mbajë deri në 6 tonelata ujë.

Dy vendet aktivizuan Mekanizmin Evropian të Mbrojtjes Civile pasi u përpoqën të vendosnin nën kontroll zjarre të shumta, të cilat kanë përfshirë jugun e Shqipërisë dhe periferitë veriore të Athinës.

Ndihma vjen gjithashtu pasi BE ka njoftuar injektimin e 600 milionë eurove në mekanizmin mbrojtës, për të përforcuar kapacitetet zjarrfikëse nga ajri, përballë numrit në rritje të zjarreve që bien në kohë vere në Evropë.

LEXONI GJITHASHTU:

• BE-ja i del në ndihmë Greqisë në luftën me zjarret
• Ndezën zjarre në fshatrat Zhulat dhe Karat, procedohen penalisht 2 persona