Në tetor 2023 marrim në dorëzim inceneratorin, thotë kryebashkiaku i Fierit

Kreu i Bashkisë Fier, Armando Subashi pranoi se inceneratori i Fierit nuk është funksional plotësisht.

Gjatë një interviste për emisionin ‘Now’, Subashi deklaroi se Bashkia Fier do marrë në dorëzim inceneratorin në tetor të vitit 2023, pasi mbaron afati 6-vjeçar i koncesionarit, që përfshin ndërtimin edhe administrimin në një kohë të caktuar.

Ai tha se nuk ka asnjë dijeni lidhur me kontratën e lidhur nga qeveria dhe firma koncesionare që ka ndërtuar inceneratorin, ndërsa sqaroi se momentalisht ai funksionon si impiant i përpunimit të mbetjeve, pa procesionin e incenerimit (djegies).

“Ne u njoftuam në maj apo qershor të vitit të shkuar që mund të fillonim të depozitonim mbetjet tek impianti i ri, që veç pjesë së djegies, pjesa tjetër kishte filluar të punonte. Inceneratori nuk është tamam ashtu, por është impianti i trajtimit dhe përpunimit të mbetjeve. Bëhet riciklimi, dhe pjesa tjetër e proceseve”, tha Subashi.

Subashi mohoi të kishte dije lidhur me kompaninë e zgjedhur për të ndërtuar inceneratorin e Fierit, teksa sqaroi se Komisioni i Vlerësimit të Ofertave vepron në mënyrë krejtësisht të pavarur në punën e vet.

Ai u shpreh se ishte thirrur si deklarues nga SPAK dhe se ishte i gatshëm të shkonte sërish sa herë të ishte e nevojshme.

LEXONI GJITHASHTU:

• SPAK duhet t’i vinte prangat Veliajt për inceneratorin e Tiranës, thotë Bushati
• Ministrja Balluku e kryebashkiaku Subashi ‘dëshmojnë’ për inceneratorët