Nesër mbahet seanca për Kosovën, çfarë pritet të ndodh në Kuvendin e Shqipërisë

Seanca plenare e së enjtes do t’i  dedikohet plotësisht Kosovës. Kjo seancë e posaçme është rezervuar për diskutime lidhur me ngjarjen e 24 shtatorit në Banjskë të Zveçanit, ndërsa pritet që ligjvënësit shqiptarë të votojnë një rezolutë e cila dënon sulmin e serbëve ndaj policisë së Kosovës.

Megjithatë, pavarësisht rëndësisë, opozita dhe mazhoranca u dakordësuan me vështirësi për daljen me një rezolutë të përbashkët.

Një ditë më parë Sali Berisha deklaroi se PD do të kërkojë të votohet rezoluta e tyre, pasi mazhoranca sipas tij, refuzon të bëjë përgjegjëse Serbinë për sulmin ku mbeti i vrarë një efektiv i policisë së Kosovës. Vendim i cili u ndryshua në konferencën e kryetarëve që u mbajt mesditën e së mërkurës ku u dakordësua për miratimin e një rezolute.

Axhenda parashikon zhvillimin e një mocioni me debat për këtë çështje, ndërsa i pranishëm do të jetë vetëm kryeministri Edi Rama dhe ministri i jashtëm Igli Hasani që do të shpjegojnë qëndrime e mbajtura nga Tirana zyrtare deri më tani.

Opozita ka kritikuar ashpër qëndrimin e kryeministrit Edi Rama se KFOR duhet të marrë në kontroll situatën në veri të Kosovës, duke e akuzuar se po mban të njëjtin qëndrim me Presidentin e Serbisë Aleksandër Vuçiç.

Mazhoranca, ashtu siç parashikon edhe rregullorja do të ketë shumicën e kohë për diskutime, më shumë se 2 orë e gjysmë, ndërsa Partia Demokratike gjysmën e kohës së saj.

Debate të forta pritet të ketë edhe për shkak mungesës së 8 deputetëve të Partisë Demorkatike. Gazment Bardhi dhe 7 deputetët të tjerë janë përjashtuar nga punimet e kuvendit për 10 ditë, për shkak të bllokimit të foltores seancën e shkuar. 

LEXONI GJITHASHTU:

• Tabaku: Pranë dakordësisë me PS për rezolutë të përbashkët me Kosovën
• Mediu: Të jemi të qartë me qëndrimin tonë, Izraeli e njeh Kosovën, Palestina jo