‘Nesër protestë më e madhe’, Ilda Dhori: Ministria mashtron për Parkun e Divjakës

Deputetja e Partisë Demokratike, Ilda Dhori deklaroi se protesta e banorëve të Divjakës, kundër vendosjes së traut në Parkun e këtij qyteti do të vazhdojë dhe nesër pritet të ketë një pjesëmarrje më të madhe.

Në një intervistë për Euronews Albania, Dhori u shpreh se Ministria e Turizmit po kërkon të mashtrojë qytetarët, duke thënë se do të përjashtohen nga tarifa vitin e parë, çka sipas saj, është e pavërtetë.

“Protesta do të vazhdojë, madje qytetarët kanë kërkuar për më shumë pjesëmarrje, por ndoshta edhe për shkak të një distance rreth 5 km nga qendra e qytetit, deri në hyrje të parkut dhe për shkak të pranisë së policisë, ka qenë paksa e kufizuar. Besoj se nesër do të kemi një pjesëmarrje akoma më të madhe dhe ta fillojmë mbledhjen e qytetarëve nga qendra e qytetit dhe do më pas do të marshojmë të gjithë bashkë në hyrje të parkut.

Ministria kërkon të mashtrojë banorët e Divjakës, thotë që ju do përjashtoheni dhe pas një viti, firma private e ka në menaxhim mund të  bëjë çfarë të dojë. Jemi duke luftuar për një kauzë të drejtë”, theksoi ajo.

Banorët e Divjakës refuzojnë të paguajnë lekë për të vizituar Parkun e Karavastasë në Divjakë. Ata kanë protestuar dhe janë përplasur me policinë, duke kërkuar heqjen e traut të vendosur në hyrje të parkut.

Vizitorët që hyjnë ne parkun e Divjakës, duhet të paguajnë tarifë. Bileta është kërkuar dhe vendosur nga Agjencia e Zonave të Mbrojtura me cmim 50 lekë për individët dhe 150 lekë për automjetet.

LEXONI GJITHASHTU

• “Jo traut në Parkun e Divjakës”, banorët protestojnë kundër pagesës
• “Biletë modeste, vetëm 50 lekë”, Ministria e Turizmit reagon për Parkun në Divjakë
• “Ministri arrogante”, Braçe sulmon Kumbaron për traun në Divjakë