Nga vëllai “Rrumit” tek Avdylajt, policia çmonton kamerat në zonat ‘problematike’

Ka vijuar edhe në Durrës edhe Shijak plani operacional i Policisë së Shtetit për të çmontuar kamerat e grupeve kriminale të vendosura në ambiente publike për të kontrolluar territorin dhe kundërshtarët.

Policia bën me dije se  gjatë oiperacionit në në Durrës, Shijak dhe Krujë, janë evidentuara 47 kamera të vendosura në kundërshtim me ligjin.

Nën hetim për ndërhyrje të padrejta në jetën private të tjerëve, janë marrë 8 shtetas, nga këta, 2 në Durrës, përkatësisht Plarent Dervishi dhe Dejvid Karaboja dhe 6 në Shijak, shtetasit Albert Muharremi vëllai i atij që njihet si “Rrumi i Shijakut”, Xhulio Vora, Astrit Balliu (Avdyli), Jasin Kala (Avduli), Altin Avdyli dhe Sajmir Gjepali.

Vijojnë hetimet e thelluara, për të identifikuar dhe proceduar shtetasit që kanë vendosur kamera në Nikël dhe në Krujë, si dhe për të zbardhur qëllimin e vërtetë të vendosjes së tyre.

“Gjatë fazës së katërt të këtij plani operacional, në Durrës, në lagjet nr. 6 dhe nr. 17, janë çmontuar 11 kamera, si dhe janë në hetim, shtetasit D. K. dhe P. D. (aktualisht i shpallur në kërkim për një vepër tjetër penale).

Plani operacional ka vijuar në Shijak dhe nga kontrolli i ushtruar në qendrat urbane të kësaj bashkie, bazuar në planin e masave të iniciuar nga Drejtoria e Përgjithshme e Policisë së Shtetit, u çmontuan dhe u sekuestruan 18 kamera të vendosura në lagjen e “Keçeve” dhe në lagjet “Popullore”, “Kodër Sukth” dhe “Partizani”.

Në vijim të veprimeve procedurale për këto raste, janë në hetim shtetasit J. K., A. B., A. A., Xh. V., A. M. dhe S. Gj.

Gjithashtu, plani operacional “Fijet”, ka vijuar në Krujë dhe në Nikël, ku janë çmontuar dhe sekuestruar 18 kamera të tjera, të vendosura në shtyllat elektrike të disa lagjeve të qytetit të Krujës dhe në Nikël. Vijon intensivisht puna hetimore, për identifikimin dhe procedimin penal, të shtetasve që kanë vendosur në mënyrë të kundërligjshme, këto kamera.

Në bashkëpunim me prokuroritë pranë gjykatave të rretheve gjyqësore Durrës dhe Krujë, vijon puna intensive për zbardhjen e plotë të qëllimit të vendosjes së kamerave në Nikël dhe në Krujë, si dhe për identifikimin dhe procedimin penal të shtetasve që i kanë vendosur këto kamera”, thuhet në njoftimin e policisë.

LEXONI GJITHASHTU:

• Policia e Shkodrës çmonton 38 kamera të tjera sigurie: I shërbenin grupeve kriminale
• Kriminelët ‘kontrollojnë’ policinë, nis verifikimi i kamerave në çdo qytet
• Policia aksion në Vlorë, kontrolle për kamerat e instaluara nga grupet kriminale