Një karvan me 21 autobusë u larguan të hënën nga Zaporizhia drejt qytetit të rrethuar të Mariupolit, ku rreth 350 mijë persona janë bllokuar prej javësh.

Me ndërprerjen e bombardimeve, kjo autokolonë e udhëhequr nga Kryqi i Kuq Ndërkombëtar synon të kthehet me të gjithë personat e bllokuar, që kanë mbetur pa ujë dhe elektricitet.

Ndërsa luftimet në rrugët e Mariupolit intensifikohen, në Kharkiv, rreth 300 kilometra në veri, disa qindra ushtarë dhe vullnetarë janë vendosur në gatishmëri për të zmbrapsur ofensiva të mundshme ruse.

Frika ndërthuret me kurajën në çdo segment të pikës së kontrollit. Një oficer ukrainas tregon se si i shpëtoi bombardimit rus.

“Ishte vërtet e frikshme. Zhurma ishte shurdhuese, por bodrumi më mbrojti. Nuk mund t’jua përshkruaj me fjalë ndjenjat e mia dhe frikën që kisha për familjen time”, tha një oficer ukrainas.

Rusët bombardojnë Kharkivin prej javësh, por ende nuk kanë arritur ta rrethojnë plotësisht qytetin. Sulmi i fundit la të paktën 5 të vdekur.

Në një zonë që u ka shpëtuar bombardimeve, Moska ka ndërmarrë një tjetër fushatë, që ka të bëjë më shumë me konsumin vendas.

Ushtarët rusë janë parë duke shpërndarë ndihma humanitare banorëve të një qyteti në rajonin e Kharkivit.