“Një minutë heshtje”, Berisha: Kadare ngriti një Olimp të vërtetë letrat shqiptare

Kryetari i Partisë Demokratike, Sali Berisha, përshëndeti përzemërsisht mbështetësit dhe shprehu mirënjohjen për përkushtimin e tyre ndaj kauzës shqiptare.

Ai vlerësoi shkrimtarin Ismail Kadare, i cili u nda nga jeta, duke e cilësuar si një gjeni botëror të letrave dhe një atdhetar të madh.

Berisha bëri thirrje për një minutë heshtje në nderim të Kadaresë, duke theksuar kontributin e tij të jashtëzakonshëm për kulturën dhe kombin shqiptar. “I përjetshëm kujtimi i tij,” përfundoi ai.

Njoftimi i Berishes:

Të dashur qëndrestarë dhe qëndrestare të pamposhtur, misionarë të kauzës së drejtë të shqiptarëve.
Të kauzës së shpëtimit të kombit shqiptar dhe Shqipërisë!
Ju përshëndes përzemërsisht dhe shpreh mirënjohjen më të pakufishme ndaj jush, oratorëve fjalëzjarrtë të kësaj platforme që rrezatojnë në të katër anët të vërtetat e diktaturës së bazuar në krimin, drogën dhe vjedhjen e shqiptarëve.
Të dashur miq, sot shqiptarët në Tiranë, Shqipëri dhe kudo që ndodhen i dhanë lamtumirën e fundit gjeniut botëror të letrave, shkrimtarit që qëmtoi në kohëra shpirtin shqiptar, shkrimtarit atdhetar që arriti apo ngriti në një Olimp të vërtetë letrat shqiptare, Ismail Kadaresë.
Ndaj dhe unë, për të shprehur nderimin, mirënjohjen tonë të pakufishme për shërbimet e tij ndaj kulturës, shpirtit dhe kombit shqiptar, ju ftoj ta nderojmë me një minutë heshtje gjeniun botëror të letrave, Ismail Kadarenë.
I përjetshëm kujtimi i tij!