Një tjetër humbje e madhe për sportin elbasanas dhe atë shqiptar

Ka ndërruar jetë Xhevahir Taushani, një nga figurat më emblematike të futbollit në Elbasan dhe në Shqipëri gjatë viteve ’60.

Emri i tij mbetet i paharruar në historinë e sportit vendas dhe më gjerë.

Taushani nisi karrierën si futbollist që në moshë të re, duke u afirmuar shpejt si një mbrojtës i fortë, i disiplinuar dhe me një personalitet të spikatur në fushë.

Për dy sezone ai veshi fanellën e Dinamos së Tiranës, ku dha një kontribut të çmuar në elitën e futbollit shqiptar dhe fitoi respektin e të gjithëve.

Aftësitë dhe përkushtimi i tij e bënë pjesë edhe të ekipeve përfaqësuese të Shqipërisë, ku mbrojti ngjyrat e vendit me dinjitet.

Pas mbylljes së karrierës si lojtar, Xhevahir Taushani nuk u shkëput nga futbolli. Ai u angazhua si drejtues pranë klubit të Elbasanit, duke kontribuar në rritjen dhe edukimin e brezave të rinj dhe në zhvillimin e mëtejshëm të ekipit.

Kujtimi për Xhevahir Taushanin do të jetojë gjatë në zemrat e sportdashësve, kolegëve dhe të gjithë atyre që patën fatin ta njohin nga afër.

Figura e tij do të mbetet përherë e respektuar, e shkruar me germa të arta në historinë e futbollit elbasanas dhe atij shqiptar.

Elbasani dhe futbolli shqiptar i përkulen me nderim figurës së tij të paharrueshme